Թուրքական Zaman-ն անդրադարձել է Թուրքիայի տնտեսության վերջին շրջանի հաջողություններին և անհաջողություններին, այդ թվում` Հայաստանի հետ առևտրին, որը ներկայացնում ենք Ձեր ուշադրությանը որոշ կրճատումներով:
Թուրքական թերթի սյունակագիր Ամանդա Փոլը ներկայացրել է, թե ինչ քաղաքականություն է վարում Թուրքիան` ավելացնելու արտաքին առևտուրը:
Թուրքիան Չինաստանի հետ մեկտեղ ամենաարագ աճող տնտեսությունն է աշխարհում: Անցած տարի այն արձանագրել է 8.9% աճ: Հիմա Թուրքիան աշխարհի 16-րդ տնտեսությունն է, իսկ 2023թ., երբ այն նշելու է հանրապետության ստեղծման 100-ամյակը, թուրքական կառավարությունը պլանավորում է մտնել աշխարհի ամենազարգացած տնտեսությունների 10-յակ: Մինչդեռ դեռևս տասը տարի առաջ Թուրքիայի տնտեսությունը շատ վատ վիճակում էր և դեգերում էր «շեղբի ծայրին»:
Թուրքիան բնական առևտրային կենտրոն է, քանի որ շատ հարմար ռազմավարական դիրք է գրավում, ինչպես նաև պատմականորեն հաստատված լուրջ հարաբերություններ ունի հարևանների հետ: Նույնիսկ Հայաստանի հետ, որի հետ Թուրքիան դիվանագիտական հարաբերություններ չունի, անցած տարի երկկողմ առևտրաաշրջանառությունը կազմկել է $210.9 մլն, ինչը 19%-ով ավելին է, քան 2009թ.-ին:
Հայաստանը Թուրքիա է արտահանել ընդամենը $1.23 մլն-ի ապրանք: Թուրքիան առևտրային կապեր է հաստատում աշխարհի բոլոր ծայրամասերում` Աֆրիկա, Հարավային Ամերիկա, հեռավոր Արևելք:
Աֆրիկայի հետ առևտրաշրջանառությունը վերջին երեք տարվա մեջ եռապատկվել է` կազմելով $12 մլրդ: Աշխարհի բնակչության մոտ 25%-ը բնակվում է այս տարածաշրջանում, իսկ 56 երկիր ընդամենը 4 ժամվա հեռավորության վրա են Թուրքիայից (ինքնաթիռով): Աշխարհի էներգակիրների 2/3-ը գտնվում է Թուրքիայի հետ հարևանությամբ, իսկ նրա տարածքը ամենահարմարն է այդ էներգակիրները տեղափոխելու համար:
«Զրո խնդիրներ, առևտուր առանց սահմանների». սա է թուրքական կառավարության կարգախոսը: Սյունակագիրը գրում է, որ վերջին 8 տարիներին, երբ իշխանության է Արդարություն և զարգացում կուսակցությունը, արտաքին ներդրումները Թուրքայի տնտեսության մեջ 6 անգամ ավելին են եղել, քան անցած 80 տարիների ընթացքում, երբ գոյություն է ունեցել Թուրքիայի Հանրապետությունը:
Սակայն Թուրքիայի տնտեսությունը նաև լուրջ խնդիրներ ունի: Տարեցտարի աճում է Թուրքիայի առևտրային բալանսի բացասական սալդոն: Անցած տարի այն կազմել է $6.3 մլրդ, ինչը պայմանավորված է էներգակիրների մեծ ծավալներով ներկրմամբ, քանի որ Թուրքիայի տնտեսությունը դրա կարիքը շատ ունի: Փորձագետները կարծում են, որ այս բացասական միտումներն ապագայում էլ աճելու են: