Իսպանիայի առաջնություն. «Բարսելոնա»-ի դժվար հաղթանակը (տեսագրություն)

Իսպանիայի առաջնության 24-րդ տուրի կենտրոնական հանդիպումը կայացավ Բարսելոնի «Նոու Կամպ» մարզադաշտում, որտեղ «Բարսելոնա»-ն ընդունեց «Ատլետիկ Բիլբաո»-ին: Խաղից առաջ, անկասկած, բոլորի մեջ հարց կար` վերականգնվե՞լ են արդյոք կատալոնացիները չորեքշաբթի օրը Չեմպիոնների լիգայի 1/8 եզրափակիչում «Արսենալ»-ին պարտվելուց հետո: Ինչպես հետագայում տեսանք՝ վերականգնվել են, բայց ոչ ամբողջությամբ: Արդեն 3-րդ րոպեին հաշիվը բացեց Վիլյան: Բայց արդարության համար նշենք, որ Վիլյաին փոխանցում կատարող Ալվեշը մինչ այդ` փոխանցում ստանալիս, գտնվում էր բացահայտ խաղից դուրս վիճակում: Ինչևէ, եզրային մրցավարը չբարձրացրեց դրոշակը, և գոլը հաշվվեց: Բասկերն ընդունած գոլից հետո խուճապի չմատնվեցին, ինչպես դա սովորաբար լինում է «Նոու կամպ»-ում հյուրընկալված թիմերի հետ: Առաջին խաղակեսում Գվարդիոլայի սաները թույլ չտվեցին մրցակցին լուրջ վտանգավոր գրոհներ կազմակերպել: Իսկ ահա երկրորդ խաղակեսն «առյուծներ»-ը շատ ագրեսիվ սկսեցին. ամբողջ դաշտով մեկ պրեսինգի էին ենթարկում «Բարսելոն»-ին, ինչը շուտով տվեց իր արդյունքը: 50-րդ րոպեին Բուսկեսը չհասցրեց Լյորենտեի հետևից և սեփական տուգանային հրապարակում կատարած սահանկման ժամանակ խախտեց կանոնները: Իռաոլան նշակետից չվրիպեց` 1:1: Սովորաբար կամային բարձր հատկանիշներով աչքի ընկնող «Ատլետիկ»-ի ֆուտբոլիստները ևս 10-15 րոպե շարունակեցին նույն ոգով, բայց վերջին 25 րոպեներն անցան կատալոնացիների թելադրանքով: 78-րդ րոպեին «Բարսա»-ն, ի վերջո, կարողացավ խփել այդքան անհրաժեշտ գոլը: Կրկին Ալվեշի աջ եզրից կատարած փոխանցումից հետո աչքի ընկավ Մեսսին` խփելով իր 25-րդ գնդակը Իսպանիայի ընթացիկ առաջնությունում: Մնացած ժամանակում կատալոնացիներն ավելի մոտ էին հաշվի տարբերությունը մեծացնելուն, քան «Ատլետիկ»-ը` հավասարեցնելուն, բայց այդպես էլ նոր գոլեր չգրանցվեցին: «Բարսելոնա»-ն հաղթեց 2:1 հաշվով ու կրկին 5 միավորով գերազանցում է Մադրիդի «Ռեալ»-ին: Երեկ կայացած մյուս հանդիպումներում գրանցվել են հետևյալ արդյունքները. «Վիլյառեալ»-«Մալագա»` 1:1, «Ալմերիա»-«Դեպորտիվո»`1:1, «Խետաֆե»-«Ռասինգ»` 0:1, «Օսասունա»-«Էսպանյոլ»` 4:0, «Սևիլիա»-«Հերկուլես»` 1:0: Շաբաթ օրը կայացած հանդիպումներին կարող եք ծանոթանալ այստեղ: «Ռեալ Սոսյեդադ»-«Մալյորկա» հանդիպումը կկայանա այսօր: