Նուբարաշենի զորամասերից մեկում անցյալ տարվա հոկտեմբերի 10-ին ծառայակցի կողմից դանակահարված շարքային զինծառայող Անդրանիկ Արամյանը երկու վիրահատությունից հետո էլ չի զգում վնասված թևը և չի կարողանում շարժել մատները:
Ըստ գործի նյութերի, դանակահարողը` Վաչիկ Սարգսյանը, հանդիսանալով ՀՀ ՊՆ N զորամասի ժամկետային զինծառայող, կոչումով շարքային, 25.10.2010թ. զորամասի ճաշարանում վիճաբանել է Անդրանիկ Արամյանի հետ, որի ժամանակ դիտավորությամբ դանակով հարվածել է վերջինիս ու նրա առողջությանը պատճառել ծանր վնաս: Դանակահարության պատճառը անեկդոտն էր եղել: Ժամկետային զինծառայող, Վայոց ձորի մարզի Եղեգնաձորի Գետափ գյուղից զորակոչված Անդրանիկ Արամյանը ապարանցու մասին անեկդոտ էր պատմել: Անդրանիկի քրոջ` Հայկուհու պատմելով, չորս ընկերներով «նարյադի» են կանգնած եղել, ու որպեսզի ժամանակն ավելի թեթև անցնի, անեկդոտներ են պատմել: Անդրանիկն էլ ապարանցու մասին է անեկդոտ պատմել, ինչից շատ վիրավորվել է նրա ապարանցի ծառայակից` Վաչիկը. վերջինս շատ կոպիտ տոնով ասել է. «Անդո, էդ քո վրով ե՞ս պատմում»: Դրան հետևել է նաև դանակի հարվածը: Վաչիկը ցանկացել է առջևից Անդրանիկի սրտին խփել, սակայն վերջինս ձեռքով կանխել է և հարվածի ուղղությունը շեղել, ինչի արդյունքում դանակի հարվածից կտրվել է նրա թևից սիրտ գնացող զարկերակը: Նրան շտապ տեղափոխել են Երևանի կենտրոնական զինվորական հոսպիտալ, որտեղ կատարված վիրահատությունը շատ անհաջող է եղել, սխալ բուժում են արել:
Տուժողի քրոջ պատմելով, երբ եղբոր վիճակը վատացել է և արյունը «չի խաղացել» երակներում, թարախն էլ «սրտին է խփել», ինքը կանչել է այդ բաժանմունքի պետին, ով արհամարհական տոնով ասել է. «Ի՞նչ ես սաչոկություն անում»: Նման արհամարհական վերաբերմունքի, անարդյունավետ բուժօգնության արդյունքում, երկրորդ վիրահատության անհրաժեշտություն է առաջացել, և Անդրանիկին տեղափոխել են Հանրապետական հիվանդանոց: Այստեղ ևս նա վիրահատության է ենթարկվել, սակայն դա ևս ոչ մի արդյունք չի տվել, և բժիշկները գրեթե հույս էլ չեն տվել, որ վնասված ձեռքի աշխատունակությունը կվերականգնվի:
Անդրանիկն արդեն երեք օր է, որ գտնվում է կուրորտաբանության և ֆիզիկական բժշկության գիտահետազոտական ինստիտուտում` հուսալով, որ գուցե ֆիզիկական բժշկության միջոցով հնարավոր կլինի վերականգնել վերին վերջույթի շարժունակությունը: Առայժմ չի հաջողվում: Եվ այդ ամենի ֆինանսական ծախսերը Անդրանիկի բազմազավակ ընտանիքը ստիպված միայնակ է կրում ու մի կերպ:
Հայկուհու պատմելով, Անդրանիկն ու Վաչիկը ընկերներ են եղել, Անդրանիկը միշտ օգնել է Վաչիկին, քանի որ նա անհայր տղա է: Բայց նույնիսկ ընկեր լինելը չէր օգնել Վաչիկին ճիշտ հասկանալ, որ Անդրանիկի պատմածը զուտ անեկդոտ է:
Վերջինիս ընդամենը երկու ամիս էր մնացել ծառայությունն ավարտելու և հայրենի գյուղ վերադառնալու` հարազատ օջախին օգնելու: Բայց այնպես ստացվեց, որ առանց այն էլ առօրյա հոգսերի մեջ խրված ընտանիքը նաև Անդրանիկի առողջական խնդիրների ֆինանսական ծախսը պետք է հոգա: Անդրանիկի հարազատները նաև շատ վիրավորված են զինվորի նկատմամբ պետության տարբեր օղակների անտարբերությունից ու անարդարությունից: Անդրանիկը ծառայության ժամանակ նաև Հայաստան ներթափանցած և Դիլիջանի հենակետեր հասած ադրբեջանցու էր վնասազերծել, սակայն նրան հասանելիք պարգևն ուրիշին էր հասել:
Ի դեպ, տեղեկություններ կան, որ դանակահարությունից հետո Վաչիկ Սարգսյանը շարունակել է ծառայել զորամասում. նրա նկատմամբ որևէ խափանման միջոց չի կիրառվել, իսկ այժմ կալանքի տակ է, թե ոչ` դեռ անհայտ է: Նրան մեղադրանք է առաջադրվել ՀՀ քրեական օրենսգրքի 112 հոդվածի 1-ին մասով` դիտավորությամբ մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որևէ օրգանի կամ օրգանի ֆունկցիայի կորուստ…, ինչպես նաև կյանքի համար վտանգավոր այլ վնաս է պատճառել առողջությանը կամ առաջացրել է դրա քայքայում` զուգորդված ընդհանուր աշխատունակության ոչ պակաս, քան մեկ երրորդի կայուն կորստով կամ հանցավորի համար ակնհայտ մասնագիտական աշխատունակության լրիվ կորստով, պատժվում է ազատազրկմամբ երեքից յոթ տարի ժամկետով:
Նախաքննությունն ավարտվել է: Գործը Էրեբունի և Նուբարաշեն վարչական շրջանների ընդհանուր իրավասության դատարանի դատավոր Վարդան Գրիգորյանի վարույթում է, և դեռ դատական նիստերը չսկսված` Անդրանիկ Արամյանի քույրը արդեն երկու օր է` փակ հեռախոսահամարից զանգահարած տղամարդուց ինչ-որ սպառնալիքներ է ստանում. պահանջում են, որ նա չբողոքի, հակառակ դեպքում նրա եղբոր կյանքը ՙկխլեն՚: Անդրանիկի հարազատների գնահատմամբ, Վաչիկ Սարգսյանին առաջադրված մեղադրանքը շատ մեղմ է: Հայկուհին երեկ փոխանցեց ՙԺամանակ՚ օրաթերթին, որ սպառնալիքների մասին հաղորդում է ներկայացնելու ոստիկանություն: Իսկ երբ իրավապահները պարզեն (ինչը շատ հեշտ է), թե ով է սպառնալիք տվողը, ապա Վաչիկ Սարգսյանի կողքին մի անձ էլ կհայտնվի: Իսկ մենք կհետևենք այս գործին:
Առաջիկա դատական նիստը կկայանա մարտի 10-ին:
«Ժամանակ» օրաթերթ