Հոլանդական ավտոարտադրող Spyker ընկերությունը Saab-ի անվճարունակ ճանաչվելու պատճառով ամերիկյան General Motors-ից պահանջել է 3 մլրդ դոլար:
Համապատասխան հայցը ներկայացվել է Միչիգան նահանագի, Արևելյան շրջանի Շրջանային դատարան օգոստոսի 6-ին: Այդ մասին նշվում է Spyker-ի մամլո հաղորդագրության մեջ:
1990 թ. GM-ը գնել էր Saab-ը, սակայն 20 տարի անց այն վաճառեց հոլանդական Spyker-ին, որը նպատակ ուներ վերականգնել Saab-ի արտադրությունը: Անցյալ տարվա գարնանը շվեդական ընկերության արտադրությունը դադարեցվեց մատակարարներին ու աշխատակազմին ունեցած պարտքի պատճառով: Հոկտեմբերին Spyker-ը, որն այդ ժամանակ կոչվում էր Swedish Automobile և հետո միայն վերադարձրեց իր հին անվանումը, պայմանավորվածություն էր ձեռք բերել չինական Pang Da և Youngman ընկերությունների հետ 100 մլն եվրոյով Saab-ը վաճառելու շուրջ:
GM-ից տեղեկացրեցին, որ կապված ընկերության վերավաճառքի հետ հնարավոր է տեխնոլոգիաների և բաղադրիչների մատակարարման դադարեցում, քանի որ դա ձեռք չի տալիս բաժնետերերին: Ամերիկյան ավտոարտադրողը գործարքը արգելափակեց, մտավախություն ունենալով, որ տեխնոլոգիաների փոխանցումը չինացիներին կարող է վնասել չինական և այլ երկրների շուկաներում GM-ի մրցունակությանը: Դրանից հետո շուտով Saab-ը հայտարարություն տվեց իր անվճարունակ լինելու մասին:
Spyker-ում նշում են, որ GM-ի դեմ ուղղված հայցի նպատակն է փոխհատուցում ստանալ ամերիկյան ընկերության անօրինական գործողությունների հետևանքով կրած իրենց վնասների դիմաց:
Հոլանդական ավտոարտադրողը վստահ է, որ GM-ը կանխամտածված գործողությունների է դիմել Saab-ին անվճարունակության հասցնելու համար: GM-ի մամլո քարտուղար Ջեյմս Քեինը նշում է, որ դժվարանում է դրան (հայց ներկայացնելուն) հավատալ, և իր խոսքերով՝ իրենց ընկերությունը դեռ տեղեկություն չունի, որ Spyker-ն իրենց դատի է տվել:
