Արցախում ընդդիմադիր ուժի ստեղծումը կուժեղացնի ԼՂՀ միջազգային դիրքերը: «Առաջին լրատվական»-ի հետ զրույցում նման տեսակետ հայտեց ԼՂՀ նախկին արտգործնախարար Արման Մելիքյանը: «Արցախին միանշանակ պետք է կազմակերպված, խելամիտ ծրագրեր ունեցող, գործունյա ընդդիմություն, որը կկարողանա, ի վերջո, հանրության ձայնը և տեսակետները հնչեցնել՝ անկախ նրանից դա դուր է գալիս իշխանությանը, թե ոչ»,- ասաց նա:
Արման Մելիքյանի խոսքով՝ շատ կարևոր է, որ այդ ուժում ընդգրկված բոլոր գործիչները դերակատարություն ունենան Արցախի խնդիրների լուծման առումով: «Ամեն դեպքում առաջնորդն, իհարկե, շատ կարևոր է, բայց շատ կարևոր է նաև, որ առաջնորդի շուրջ համախմբված լինի իրավահավասար մտածող մարդկանց մի թիմ, որոնցից յուրաքանչյուրն առանձին վերցրած կունենա իր դերն ու իր արժեքը, և նրանք բոլորով կկարողանան ուղղորդել Արցախի ներքաղաքական, հանրային կյանքը և ներազդել նաև արտաքին քաղաքական մոտեցումների վրա: Այսինքն՝ ես չէի ցանկանա, որ դա լիներ մեկ մարդու կուսակցություն»,- նշեց նա:
Ըստ Արման Մելիքյանի՝ շատ կարևոր է, որպեսզի այդ ուժում կարողանան ակտիվորեն իրենց գործունեությունը ծավալել Արցախի բոլոր շրջանների ներկայացուցիչները: Օրինակ, ըստ նրա, Քաշաթաղի և Բերձորի շրջանները հիմնականում ոչ բնիկ արցախցիներով են վերաբնակեցված, բնակչության մի մասը փախստականներ են: «Կարևոր է, որ հավասարությունը պահպանվի նաև այդ առումով, և տեղային փոքրիկ խանդի տեսարաններ չլինեն այնտեղ, տեղացի և եկվոր տարբերություններ չդնեն: Դա կարող է նաև դրական օրինակ ծառայել Հայաստանում, որտեղ ցավալի երևույթ է դարձել տարբերությունը. երևանցին գյումրեցուն է անուն դնում, գյումրեցին՝ վանաձորցուն, վանաձորցին՝ գորիսեցուն և այլն: Արցախն իրեն նման մասնատումներ թույլ տալու իրավունք չունի»,- ընդգծեց նա:
Արման Մելիքյանը նաև համոզված է, որ նոր ընդդիմադիր ուժը կարող է ձևավորել նաև նոր ներքաղաքական օրակարգ Արցախում: Եվ եթե այդ ուժը բավարար կշիռ ունենա, ապա, անշուշտ, իշխանությունը չի կարող հաշվի չնստել նրա հետ:
«Ես դա կարևորում եմ նաև Արցախի անվտանգության լրացուցիչ երաշխիքների ստեղծման տեսանկյունից: Իմ կարծիքով՝ այսօր ռուսական կողմը պատրաստ է սակարկել Ադրբեջանի հետ ազատագրված տարածքների շուրջ և այդ տարածքներն ադրբեջանական վերահսկողության տակ դնելու դիմաց ստանալ Ադրբեջանում նոր ռազմավարական դիրքեր, գուցե նաև իրենց ռազմական ներկայությունը վերականգնել այնտեղ: Այս տեսանկյունից ես ո՛չ Հայաստանի, ո՛չ Արցախի իշխանության մեջ բավարար ներուժ չեմ տեսնում, որը կկարողանար այդպիսի ծրագրին դիմակայել: Բայց գործուն և ակտիվ ընդդիմությունը, հատկապես Արցախում, այդ առումով կարող է էական հակակշռի դեր կատարել և ներազդել իշխանության վարքի, գործելակերպի և ծրագրերի վրա: Գոնե տարածքների հանձնման հարցով Արցախում կարող է ստեղծել անհանդուրժողականության մթնոլորտ»,- նշեց նա:
Ըստ Մելիքյանի՝ այդ ուժի շնորհիվ թե՛ Արցախի միջազգային վարկը կբարձրանա, թե՛ լրացուցիչ երաշխիքներ կստեղծվեն երկրի իշխանության համար: «Իշխանությունը կարող է ասել՝ քանի որ հզոր ընդդիմությունը դեմ է տարածքներ հանձնելուն, մենք այդ հարցը չենք կարող քննարկել»,- ասաց նա:
Հիշեցնենք, որ Արցախում ընդդիմադիր նոր ուժ ձևավորելու ուղղությամբ աշխատանք է տանում ԼՂՀ նախագահի ընտրություններում պարտություն կրած թեկնածու Վիտալի Բալասանյանը:
