Սիրիայի ազատ բանակի (ՍԱԲ) ընդդիմադիրներին հաջողվել է վերահսկողության տակ վերցնել Հալեպի ռազմավարական նշանակություն ունեցող մի քանի օբյելտներ: Ինչպես հաղորդում է թուրքական Anadolu գործակալությունը՝ վկայակոչելով ՍԱԲ իր աղբյուրները, ապստամբները գրավել են Հալեպի պատմական բերդը և նրան հարող կենտրոնական թաղամասերը:
ՍԱԲ և Սիրիայի կանոնավոր բանակի միջև մարտերը Հալեպում շարունակվում են արդեն մի քանի օր: Առավել համառ դիմադրություն է Սալահ Ադ-Դին թաղամասում, որտեղ շարունակվում են փողոցային մարտերը: Ապստամբները ցանկանում են գրավել ռազմավարական կարևոր կետերը, ինչպես նաև ռազմաբազաները և անցակետերը: Տեղի աղբյուրները նշում են, որ բանակի կանոնավոր ստորաբաժանումները հակահարձակումներ են նախապատրաստում ՍԱԲ օբյեկտների վրա, որոնց համար կօգտագործվի ավիացիա և ծանր սպառազինություն:
Դամասկոսում նույնպես իրավիճակը շարունակում է լարված մնալ: Haber Türk հեռուստաալիքի փոխանցմամբ՝ Յարմուկ թաղամասում սպանվել է 15 խաղաղ բնակիչ, տասնյակ մարդիկ վիրավորվել են: Հրթիռները և ռումբերն ընկել են բնակելի տների վրա, որտեղ ապրում են պաղեստինցի փախստականներ:
