ԱՄՆ նախագահ Բարաք Օբաման հավանություն է տվել Սիրիայում ռազմական գործողությունների հետևանքով տուժածներին 12 միլիոն դոլարի հավելյալ օգնություն տրամադրելու հարցին: Այս մասին հաղորդում է Քուվեյթի KUNA գործակալությունը:
Վաշինգտոնը հավանության է արժանացրել նաև Սիրիայի հարևանների` Հորդանանի, Լիբանանի, Թուրքիայի և Իրաքի կողմից փախստականներին աջակցելու քայլերը: Ամերիկացի փորձագետների գնահատականներով` շուրջ 1 միլիոն սիրիացիներ լքել են իրենց տները, նրանցից 130 հազարը հատել են սահմանը: Երկրին ԱՄՆ կողմից տրամադրված օգնության վերջին փաթեթը կազմում է 76 միլիոն դոլար:
Ավելի վաղ ՄԱԿ-ը հաշվետվություն է հրապարակել, համաձայն որի` Սիրիայի զինված հակամարտությունը երկրի գյուղատնտեսական ոլորտում հանգեցրել է զգալի կորուստների, ինչի հետևանքով 3 միլիոն մարդ հայտնվել է սովի սպառնալիքի տակ: Ագրարային ոլորտում երկրի տնտեսությանը հասցված վնասն այս տարի կազմում է 1,8 միլիարդ դոլար:
Հիշեցնենք, որ իշխանությունների և ընդդդիմության զինված առճակատումը շարունակվում է 2011-ի մարտից: Այդ ընթացքում զոհվել է առնվազն 19 հազար մարդ:
