Թուրքական Anadolu գործակալության փոխանցմամբ՝ Վանի նահանգը պատրաստվում է Աղթամար կղզու Սուրբ Խաչ եկեղեցու երրորդ պատարագին, որն այս տարի կմատուցվի սեպտեմբերի 9-ին: Այս մասին հայտարարել է Վանի փոխնահանգապետ Աթայ Ուսլուն:
Վերջինս բոլորին կոչ է արել այցելել Վան և ներկա գտնվել այդ պատարագին: Ուսլուն հավելել է, որ այս տարի կազմակերպվելու է Վանից Բիթլիս ծովային ուղևորություն, որը ստացել է «Ուրարտուից Սելջուկներ» անվանումը:
Հիշեցնենք, որ Աղթամար կղզու Սուրբ Խաչ եկեղեցին գործում է որպես թանգարան: 3 տարի առաջ Թուրքիայի մշակույթի ու զբոսաշրջության նախարարությունը թույլատրեց տարեկան մեկ անգամ պատարագ մատուցել այդտեղ: Առաջին պատարագը մատուցվեց 2010 թվականի սեպտեմբերի 19-ին:
