«Մենք ապրում ենք կենտրոնական զուգարանում, մեր խոհանոցը զուգարանում է»,- «Առաջին լրատվականի» հետ զրույցում ասացին Շենգավիթ վարչական շրջանի Տարոնցի փողոցի թիվ 5 հանրակացարանի բնակիչները:
Նրանց խոսքով` բազմաբնակարան շենքը սեյսմակայուն չէ, հիգիենիկ պայմաններ չկան: «Բա էս տեղ ա՞, որ ապրում ենք: Խոստացել են խնդրին լուծում տալ, բայց արդյունք չկա: Մեր երեխեքը սենց պայմաններում են մեծանում ու հիվանդանում»,- նշեցին բնակիչները:
Շենքում ապրում են նաև մեծ թվով փախստականներ: Այստեղ իրենց լքված և անտեսված են զգում, պարբերաբար ընդգծում են, որ իշխանությունները մոռացել են ժողովրդի մասին:
«Մեզ բանի տեղ դնող չկա, նպաստ են տալիս, որով կոմունալ ծախսերը հազիվ ենք փակում: Եթե դժգոհենք էլ, դրանից էլ կկտրեն: Լավ, գոնե մտածո՞ւմ են, որ, իրենցից բացի, մարդիկ կան»,- վրդովված դժգոհեցին բնակիչները:
Նրանք իշխանություններին հորդորեցին միայն ընտրությունից ընտրություն իրենց չհիշել:
«Մեր իշխանությունները հազիվ իրար հետ են վիճում` ով ինչ բիզնես ունի, ով շատ փող ունի, ով ում վզին կարա դնի ու ստանա, իր գրպանը լցնի»,- ասացին բնակիչները:
Մանրամասները՝ տեսանյութում
