Վերջին շրջանում հրապարակվող սոցհարցումներում նկատելի է միտում, որ Հայ ազգային կոնգրեսին փորձ են անում դնել, այսպես ասած, առաջատար ուժերի եռյակից դուրս:
Թվում է, թե դա ընդամենն արտահայտում է իշխանության մանրախնդրությունը: Իսկ որ Հայաստանում հրապարակվող սոցհարցումներն իշխանական սցենարներն են, դրան երեւի թե Հայաստանում նույնիսկ սոցհարցում իրականացնողներն իրենք չեն կասկածում: Եվ ուրեմն, ի՞նչն է պատճառը, որ Հայ ազգային կոնգրեսին փորձում են դուրս դնել առաջատար եռյակից:
Հարցն այստեղ այն չէ, որ եթե Կոնգրեսը, ասենք, ոչ թե չորրորդն է, այլ երրորդը, ուրեմն ամեն ինչ իր տեղում է: Իհարկե նույնիսկ այդ դասավորությունն է բացարձակապես կեղծ, երբ առաջին տեղում ՀՀԿ-ն է, երկրորդում` ԲՀԿ-ն եւ երրորդում` նոր միայն Կոնգրեսը:
Սակայն ինչո՞ւ իշխանությունը չի ուզում, որ Կոնգրեսը գոնե երրորդը երեւա իր հրապարակած սոցհարցումներում: Առավել եւս, որ այդպիսի մի յուրօրինակ սոցհարցում էլ կարելի է համարել Երեւանի քաղաքապետի ընտրությունները, որտեղ Կոնգրեսը հենց երրորդն էր` պաշտոնական տվյալով, իհարկե:
Այստեղ խնդիրն, ըստ ամենայնի, այն է, որ իշխանությունը պարզապես փորձում է անել հնարավորը, որպեսզի հանրային եւ քաղաքական գործընթացների սուբյեկտների ընկալման մեջ առաջիկա նախընտրական գործընթացներում չձեւավորվի ՀՀԿ-ԲՀԿ-Կոնգրես եռանկյունի:
Բանն այն է, որ այդ եռանկյունում իշխանության խաղալու հնարավորությունները նվազում են, հասնում գրեթե զրոյականի: Իշխանությունը լուրջ խնդիրներ ունի այդ եռանկյունու մյուս երկու կողմերի հետ էլ` թե՛ Կոնգրեսի, թե՛ ԲՀԿ-ի:
Իսկ դա նշանակում է, որ բավական ռեալ է դառնում այնպիսի իրավիճակը, երբ Հայ ազգային կոնգրեսն ու ԲՀԿ-ն կարող են ընդհանուր շահ գտնել որոշակի զարգացումներում եւ շարժվել այդ տրամաբանությամբ: Խոսքն ամենեւին այն մասին չէ, որ Կոնգրեսն ու ԲՀԿ-ն կհայտարարեն միավորվելու մասին:
Դա, իհարկե, պրակտիկ առումով անիրական թվացող տարբերակ է, թեեւ քաղաքականության մեջ, իհարկե, ոչինչ չի բացառվում: Բայց այդուհանդերձ, բանը միայն միավորվելը չէ: ԲՀԿ-ն ու Կոնգրեսը, չգործելով նույն ֆորմատում, կարող են գործել նույն տրամաբանության շրջանակում: Իսկ այդ պարագայում արդեն այսօր անիրական թվացող համատեղ գործողությունները վաղը կարող են դառնալ միանգամայն իրատեսական:
Ահա թե ինչու իշխանությունն ամեն կերպ փորձում է զարգացումների ընկալումը դուրս բերել ՀՀԿ-ԲՀԿ-Կոնգրես եռանկյունու շրջանակից եւ այլեւայլ սուբյեկտներ մտցնել այդ շրջանակ: Կստացվի՞ արդյոք դա, թե՞ ոչ` դժվար է ասել:
Համենայնդեպս, դա չի բխում թե՛ Կոնգրեսի, թե՛ ԲՀԿ շահից, քանի որ սուբյեկտների շրջանակի ընդլայնումը օգնելու է իշխանությանը ԲՀԿ-ի եւ Կոնգրեսի հետ հարաբերությունը պարզելու հարցում, իսկ Կոնգրեսի եւ ԲՀԿ համար իշխանության հետ հարաբերություն պարզելու գործընթացը ավելի բարդացնելու է: