Թուրքական Akşam թերթի փոխանցմամբ՝ Ստամբուլի ծանր հանցագործությունները քննող 14-րդ դատարանը հրապարակել է Ստամբուլի հայկական «Ակօս» շաբաթաթերթի հիմնադիր խմբագրապետ Հրանտ Դինքի սպանության գործով հիմնավոր որոշումը: Այն բաղկացած է 216 էջից:
Դրանում նշված է, որ Հրանտ Դինքի սպանության հետևում կանգնած է հանցավոր խումբ, սակայն այդ մասին լուրջ ապացույցներ «չկան»: Եթե գոյություն ունի հանցավոր խումբ, ապա «անհնար է պարզել», թե որտեղ, երբ և ինչ նպատակով է ստեղծվել այն:
Հիշեցնենք, որ Թուրքիայի նախագահ Աբդուլլահ Գյուլին անմիջականորեն ենթարկվող Պետական վերահսկիչ խորհուրդը (DDK) երեք օր առաջ ավարտին է հասցրել Հրանտ Դինքի սպանության գործով մոտ մեկ տարի առաջ սկսած հետաքննչական աշխատանքները:
Այդ նպատակով DDK-ն պատրաստել էր 653 էջանոց զեկույց, որում նշված է, որ անվտանգության ծառայություններն ու Ժանդարմերիան նախապես իմացել են Դինքին սպառնացող վտանգի մասին, սակայն քայլեր չեն ձեռնարկել դա կանխելու ուղղությամբ և չեն համագործակցել Դինքի կյանքը պահպանելու հարցում:
Բացի այդ, նշված էր, որ Դինքի սպանության հետաքննության ժամանակ եղել են թերացումներ, և որ դրանք իրականացրած պաշտոնյաները պետք է դատվեն առաջին ատյանի դատարանում:
