«ԲՀԿ հետ համագործակցության հայտարարություն արել է ինքը՝ Լևոն Տեր-Պետրոսյանը և նշել է, որ դա իր անձնական տեսակետն է, դրա համար էլ չեմ կարծում, որ այս պահին ճիշտ է այդ հայտարարությունն ընկալել որպես ՀԱԿ հայտարարություն»,- «Առաջին լրատվական»-ի հետ զրույցում ասաց ՌԱՀԿ փորձագետ Էդգար Վարդանյանը:
«Պետք է սպասել և տեսնել՝ թե արդյոք այս հայտարարությունը դառնալո՞ւ է Կոնգրեսի հայտարարություն: Ինչպես նշվեց, այս առումով կոնսենսուս չկա: Ի դեպ, սա նաև հետագայում կարող է բերել բուռն գործընթացների: Եթե հանկարծ ԲՀԿ-ն իսկապես դուրս գա կոալիցիայից, և Լևոն Տեր-Պետրոսյանը պնդի իր այս մոտեցումը, որոշ ուժերի անհամաձայնության պարագայում Կոնգրեսում նույնիսկ պառակտում է հնարավոր: Չի բացառվում, որ նման քաղաքականությանը դեմ ուժերը դուրս գան ՀԱԿ-ից:
Միաժամանակ, ճիշտ չի լինի ասել, որ Տեր-Պետրոսյանը համագործակցելու առաջարկ է արել ԲՀԿ-ին, նա միայն ասել է՝ կհամագործակցենք, եթե… Ամբողջ հարցն այդ «եթե»-ն է, ինչը նշանակում է, որ ԲՀԿ-ն պետք է դուրս գա կոալիցիայից: Բայց արդյոք ԲՀԿ-ն պատրաստվո՞ւմ է դուրս գալ կոալիցիայից. վերջին զարգացումները ցույց են տալիս, որ՝ ոչ, նրանք անգամ վերջերս հայտարարեցին, որ հավատարիմ են կոալիցիոն հուշագրին: Այս առումով, կարծում եմ, որ ԲՀԿ-ն դժվար թե ընդունի ՀԱԿ-ի պոտենցիալ առաջարկը, քանի որ չի փոխի իր դիրքորոշումը կոալիցիայի հանդեպ:
Պետք չի բացառել նաև, որ հենց ՀՀԿ ձեռքով ԲՀԿ-ն գործուղվի ՀԱԿ-ի հետ համագործակցելու դաշտ: Եթե նման բան լինի, այդ դեպքում կստացվի, որ Կոնգրեսն իշխանությունների համար կանխատեսելի է դառնում»,- նկատեց Էդգար Վարդանյանը՝ հավելելով, որ սա կարող է ծուղակ լինել Կոնգրեսի համար:
Նշենք, որ մամուլը ՀԱԿ երեկ կայացած հանրահավաքում Լևոն Տեր-Պետրոսյանի ելույթի համապատասխան հատվածը հակված է դիտարկել որպես ԲՀԿ հետ համագործակցության բացահայտ առաջարկ:
