ՌԴ-ն աջակցում է Հայաստանի և Թուրքիայի միջեւ հարաբերությունների կարգավորման գործընթացին, այսօր ճեպազրույցի ժամանակ հայտարարել Է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Ցանկանում եմ հիշեցնել, որ Ռուսաստանը անփոփոխ աջակցում է Հայաստանի եւ Թուրքիայի միջեւ հարաբերությունների կարգավորման գործընթացին: Այն գործարկվել է Մոսկվայում հունվարի 14-ին՝ մեր անմիջական միջնորդությամբ։ Մենք պատրաստ ենք այսուհետ ևս բազմակողմ աջակցություն ցուցաբերել։ Ելնում ենք նրանից, որ դա բխում է տարածաշրջանի կայունության, տնտեսական բարգավաճման շահերից», – նշել է Զախարովան։
Թուրքագետ Հակոբ Չաքրյանը համոզված է, որ Ռուսաստանն ունի նման շահագրգռվածություն, սակայն մեր զրուցակիցը դա բավականին վտանգավոր է համարում․ «Եթե շահգրգռված չլիներ, Զախարովան նման հայտարարություն չէր անի։ Բնականաբար նա արտահայտում է Լավրովի մտքերը։ Եթե այդպիսի շահագրգռվածություն կա՝ նշանակում է դեռ չի հրաժարվել «Զանգեզուրի միջանցքի» մտադրությունից։ Երկրորդ միջանցքն էլ կբացի՝ Մեղրիից մինչև Իրան մեր տարածքը՝ Սյունիքը կդարձնի ռուսական բանակի համար զորանոց»,-«Առաջին լրատվական»-ի հետ զրույցում ասաց նա։
Ըստ մեր զրուցակցի՝ կա մեկ այլ վտանգավոր բան ևս․ «Սերդար Քըլըչ-Ռուբեն Ռուբինյան հանդիպումից հետո երրորդ քաղաքացիների մասին պայմանավորվածություն էր ձեռք բերվել՝ սահմանը հատելու հետ կապված։ Ես դա տարօրինակ եմ համարում՝ եթե տակը որևէ նկրտում չկա։ Հայաստանի հետ հարաբերությունների նորմալացման շրջանակներում երրորդ երկրների քաղաքացիների հետ սահմանը բացում ես, հայերի համար՝ ոչ։ Ավելի, քան տարօրինակ է սա։ Թե ինչ նկրտում կարող է լինել, ըստ իս՝ բացվում է ՌԴ քաղաքացիների, օլիգարխների, գործարարների համար, որ ճեղքեն Եվրամիության ու ԱՄՆ-ի պատժամիջոցները»,- ասաց թուրքագետը։
Ըստ Չաքրյանի՝ եթե Հայաստանը դառնա պատժամիջոցների շրջանցման առարկա, ապա Միացյալ Նահանգները նույն պատժամիջոցները ստիպված կլինի կիրառել նաև Հայաստանի դեմ․ «2014 թվականին ընդունվել է Միացյալ Նահանգների հակառակորդների դեմ պատժամիջոցներով պայքարելու օրենքը։ Կոնգրեսն այդպիսի օրենք ընդունել է, դա նույնիսկ Բայդենը չի կարող կանխել։ Ես լսել եմ նաև, որ շուտով Պուտինը մեկնում է Թեհրան, այնտեղ է լինելու նաև Էրդողանը։ Տեղի է ունենալու երեք երկրների առաջնորդների եռակողմ հանդիպումը։ Ձեր կարծիքով՝ ո՞ր հարցը պետք է քննարկվի, բնականաբար «Զանգեզուրի միջանցքի» հարցը։ Շատ վտանագավոր խաղեր են խաղում, մինչդեռ մերոնք Ստալինի ու Լենինի նկարներով քեֆ-ուրախություն են անում Մեղրիում»։
Թուրքագետը համարում է, որ Հայաստանին շատ ավելի ձեռնտու է, որ հայ-թուրքական բանակցություններում միջնորդի ոչ թե Ռուսաստանը, այլ արևմուտքը․ «Տեսեք ԱՄՆ քանի նահանգ է ճանաչել Արցախի անկախությունը, Փարիզի գլխավորությամբ տասնյակ եվրոպական քաղաքներ ճանաչել են, համայնքներ, շրջաններ ևս։Իսկ Ռուսաստանն ի՞նչ է՝ արել՝ ի դեմս Պուտին կոչեցյալի մի քանի անգամ հայտարարել է, որ Լեռնային Ղարաբաղը բնիկ ադրբեջանական տարածք է։ Այն տարածքը, որտեղ չորրորդ ու հինգերորդ դարի վանքեր կան, այդ ժամանակ ո՛չ Ռուսաստան կար , ո՛չ ռուս։ Իսկ ադրբեջանցիները մինչև 1932-1934 թվականները կոչվում են Կովկասի թաթարներ, անուն էլ չունեին»,-եզրափակեց Հակոբ Չաքրյանը։
