Հինգշաբթի՝ հունիսի 24-ին, Արևմտյան Հնդկաստանի Թերքս և Քայքոս կղզիների ափերի մոտ փոքրիկ նավ է հայտնաբերվել, որտեղ 20 մարդու դիակ է եղել: Շաբաթ օրը Turks and Caicos Sun-ի հաղորդմամբ, Բրիտանիայի անդրծովյան տարածքի իշխանությունները փորձում են պարզել, թե որտեղից է եկել նավը, ինչպես նաև դրանում գտնվող մարդկանց մահվան պատճառները:
Ենթադրաբար, մահացածները անօրինական միգրանտներ են, բայց ոստիկանության տեղի կոմիսար Թրեվոր Բոտինգի խոսքերի համաձայն՝ նավը ժամանել է «Կարիբյան տարածաշրջանից դուրս գտնվող հատվածից»: Հաիթիից անօրինական միգրանտները հաճախ փորձում են հասնել Բահամյան կղզիներ կամ Թերքս և Քայքոս արշիպելագ, որտեղ կենսամակարդակը զգալիորեն բարձր է: Հայիթիի ափերից դեպի Գրանդ Թերք կղզի հեռավորությունը, որի ջրերում ձկնորսները հայտնաբերել են նավը, ավելի քան 200 կմ է:
Եղել են նաև ենթադրություններ, որ նավում կարող են եղած լինել Դոմինիկյան հանրապետությունից միգրանտներ, որոնք ցանկանում էին Բահամյան կղզիներից հասնել ԱՄՆ: Սակայն, ըստ թերթի, ներկայումս մշակվում է վարկած, որ նավը Աֆրիկայի արևմտյան ափից տեղափոխվել է Ատլանտյան օվկիանոսի այն կողմում գտնվող կղզիներ: Այս պարագայում, ամենայն հավանականությամբ, նավակում գտնվող մարդիկ մահացել են ծարավից: Ըստ «Ասոշիեյթիդ պրես» գործակալության՝ երկու երեխա է զոհվել:
«Չնայած այն փաստին, որ [նավի վրա հայտնաբերված մարդկանց] մահվան պատճառները պարզված չեն, կանխամտածված սպանության հավանականության մասին որևէ ցուցում չկա: Այնուամենայնիվ, հետաքննությունն ուսումնասիրում է բոլոր վարկածները, թե ինչպես կարող էին նրանք մահանալ»,-ասվում է Թերքս և Քայքոսի ոստիկանության բաժանմունքի կողմից տարածված հայտարարության մեջ:
