Արմավիրի մարզպետ Համբարձում Մաթևոսյանն իր ֆեյսբուքյան էջում գրառում է կատարել.
«Արմավիրի մարզի սիրելի բնակիչներ,
Կենտրոնական ընտրական հանձնաժողովի կողմից Ազգային ժողովի հունիսի 20-ի արտահերթ ընտրությունների նախնական արդյունքներով մեր մարզում ընտրության մասնակցած անձանց 63,5 %-ն (66,205 փաստացի հավաքագրված ձայներ) իր քվեն տվել է իշխող «Քաղաքացիական պայմանագիր» կուսակցությանը:
Գրանցված բարձր ցուցանիշի և մեր հանդեպ դրսևորած նման վստահության համար իմ խորին շնորհակալությունն եմ հայտնում յուրաքանչյուրիդ:
Հարգելիներս, մեկ բան ակնհայտ է, Ձեր վստահությունն արդարացվելու է տարբեր բնագավառներում տեսանելի և շարունակվող բարեփոխումներով ու զարգացման ծրագրերով, որոնց արդյունքում մենք կարճ ժամանակ անց կունենանք ամուր և զարգացող Հայաստան:
Մեր Հայրենիքի և նրա կարևոր մասնիկը հանդիսացող Արմավիրի մարզի պայծառ ապագայի տեսլականը կյանքի կոչելու և մեկ օր առաջ այն իրականություն դարձնելու համար կոչ եմ անում մեր մարզում տարբեր քաղաքական հայացքներ և դիրքորոշումներ ունեցող բոլոր ուժերին, անձանց համախմբվել շեն Հայաստան, մարզ ու համայնք ունենալու գաղափարի շուրջ և միասնաբար լծվել հանրօգուտ աշխատանքի՝ կերտելու մեր երազանքների երկիրը:
Որպես Արմավիրի մարզպետ՝ դարձյալ վերահաստատում եմ իմ պատրաստակամությունը՝ մարզը զարգացման տանող ծրագրերի և առողջ գաղափարների շուրջ համագործակցելու հարցում:
Ի գործ:
Աստված պահապան Հայաստանին ու հային»:
