Apple-ը AppStore-ից հանել է Parler հաղորդագրությունների ծրագիրը, որն օգտագործում են ԱՄՆ ներկայիս նախագահ Դոնալդ Թրամփի կողմնակիցները: Այս մասին հայտնում է CNBC հեռուստաալիքը՝ վկայակոչելով ընկերության ներկայացուցչի հայտարարությունը:
«Մեր հարթակում բռնության սպառնալիքների և անօրինական գործողությունների տեղ չկա: Parler-ը համարժեք միջոցներ չի ձեռնարկել անվտանգության այս սպառնալիքների տարածումը կանխելու համար: Մենք արգելափակել ենք Parler-ը App Store-ում, քանի դեռ նրանք չեն լուծել այս խնդիրները», – ասվում է հաղորդագրության մեջ:
Apple-ը հայտնեց, որ Parler-ի օգտատերերի գրառումները, կապված ԱՄՆ Կապիտոլիումի անկարգությունների հետ, պարունակում են բռնության կոչեր, ինչը խախտում է ընկերության կանոնները:
Ավելի վաղ Twitter-ը հայտարարել էր Թրամփի անձնական հաշիվն արգելափակելու մասին: Միջոցառումներն արդարացված են բռնության դրդման ռիսկով: Այնուամենայնիվ, երկրի նախագահը, կատաղած կատարվածից, իր շտաբի պաշտոնական հաշվում ասաց, որ Twitter-ը իրեն չի լռեցնի:
