«Ժողովուրդ» թերթը գրում է. ««Ժողովուրդ» օրաթերթը տեղեկացավ, որ Հայաստան ներգնա զբոսաշրջային այցելությունները, բնականաբար, նվազել են: Այս տարվա հունվար-մարտ ամիսներին այդ թիվը կազմել 139 հազար 619: Նախորդ տարվա նույն ամիսների համեմատ գրանցվել է 12 տոկոս անկում. 2019 թվականի հունվար-մարտ ամիսներին ներգնա զբոսաշրջային այցելությունները կազմել են 158 հազար 672: Սա, իհարկե, վատ ցուցանիշ է: Պատճառը կորոնավիրուսն է, որի տարածումը կանխարգելելու նպատակով հայտարարված արտակարգ դրության ռեժիմով պայմանավորված՝ տնտեսական գործունեության որոշ սահմանափակումներ բացասական են ազդել նաև Հայաստանի ներգնա զբոսաշրջության ոլորտի վրա:
Հիշեցնենք, որ անգամ երկրների միջև թռիչքներն են դադարեցվել, և դա ազդել է նաև արտագնա զբոսաշրջության վրա: Այս տարվա առաջին եռամսյակում Հայաստան ժամանողների թիվը զգալի պակասել է: Ըստ Վիճակագրական կոմիտեի՝ այս դեպքում անկումը կազմել է 14.6 տոկոս, այսինքն՝ այս տարվա հունվար-մարտ ամիսներին ՀՀ ժամանել են 311 հազար 264 ուղևոր, մինչդեռ նախորդ տարվա նույն ժամանակահատվածում ժամանողները կազմել են 364 հազար 489»:
Առավել մանրամասն՝ թերթի այսօրվա համարում:
