«Առաջին լրատվական»-ի զրուցակիցն է «Սասնա ծռեր» համահայկական կուսակցության քարտուղարության անդամ Վարուժան Ավետիսյանը։
– Պարոն Ավետիսյան, արտախորհրդարանական ուժերը հիմնականում կողմնորոշվել են, թե ինչ դիրքորոշում կունենան հանրաքվեի հետ կապված։ «Սասնա ծռերը» ե՞րբ կհստակեցնի իր անելիքներն այս իրադարձությունների հետ կապված։
– Վերջնական տեսակետն առաջիկայում կհայտարարենք։ Բայց Ժիրայր Սեֆիլյանը մի քանի հարցազրույց տվել է ու ընդհանուր առմամբ մեր մոտեցումները ներկայացրել։ Այս պահին ավելացնելու բան չկա։
– Հակաիշխանական բոլոր ուժերը տեղավորվել են «բոյկոտ» անելու ճամբարում։ Ի՞նչ մարտավարություն է սա՝ ըստ Ձեզ։
– Դուք նկատի ունեք 5-րդ շարասյա՞նը։ Մեր մոտեցումները գեներացնող ընդհանուր տեսակետի մի բաղադրիչն էլ այն է, որ իշխանությունները լավ չեն հաշվարկել, թե ինչ են անում, ու 5-րդ շարասյանը հնարավորություն են տվել ճիշտ դիրքավորվելու մարտավարական առումով ու բավականին արդյունավետ իրենց համար ակնկալիքներ ունենալու՝ դրանով իսկ վտանգելով մեր երկրի կայունությունը, ապագան առհասարակ, նաև մեծացնելով ռևանշի հնարավորությունները։ Մեր վերջնական տեսակետի մեջ սա էլ կներկայացնենք։ Պետք է հաշվի առնենք, որ գործող իշխանությունը սխալը սխալի հետևից է կատարում ու նաև 5-րդ շարասյան նկատմամբ ոչ արդյունավետ գործելաոճ է որդեգրել՝ ստեղծելով սև-սպիտակ արհեստական վիճակ ու իր համար այդպիսով հեշտ կառավարում։
– Հիմա եթե դուք իրենց չաջակցեք, դուք և՞ս «սև»-ի պիտակ կստանաք իրենց կողմից։
– Մեզ որևէ մեկը չի կարող սև անվանել, չգիտեմ այդ բնութագրման չափանիշներն ով է սահմանել։
– Դուք այս հարցի շուրջ իրենց հետ պատրաստվո՞ւմ եք հանդիպել։
– Ցանկություն ունենք իշխանության հետ քննարկելու անելիքը, տեսնենք, թե ինչպես կստացվի։ Հրապարակայնորեն ասել ենք, որ ցանկություն ունենք։ Մեր տեսակետները Ժիրայր Սեֆիլյանը նախնական վիճակում արտահայտել է։ Պրիմիտիվ «այո»-ին ու «ոչ»-ին հանգելու հարց չեն մեր պետության առջև ծառացած խնդիրները, խորը ճգնաժամը հաղթահարելու հարց է, ու այդ մասշտաբով ու խորությամբ պետք է մոտենալ երևույթին, ոչ թե կեղծ Սահմանադրության մեջ մի կետ փոխելով կամ չփոխելով։ Արտաքուստ կարող է նաև տպավորություն առաջանալ, որ որևէ ողջամիտ տեսակետ հայտնող մեկը՝ լինի քաղաքացի կամ որևէ կազմակերպություն, անգամ կարող է պիտակավորվել։ Բայց դա մեզ չի վերաբերելու, որովհետև մենք հարցին բոլորովին այլ կերպ ենք մոտենալու։
