Ֆուտբոլի Եվրոպա լիգայի խաղարկության որակավորման առաջին փուլում պատասխան հանդիպումներում մեր թիմերից «Ալաշկերտն» ու «Փյունիկը» ֆուրոր արեցին Հյուսիսային Մակեդոնիայում: Հայաստանի գավաթակիր «Ալաշկերտը» 3:0 հաշվով առավելության հասավ «Մակեդոնիայի» նկատմամբ: Հիշեցնենք, որ այս թիմերի միջև Երևանում կայացած առաջին խաղում «Ալաշկերտը» առավելության էր հասել 3:1 հաշվով:
«Փյունիկը» սեփական հարկի տակ 3:3 խաղալուց հետո Սկոպյեում դրամատիկ պայքարում 2:1 հաշվով առավելության հասավ «Շկուպիի» նկատմամբ: Այս մրցավեճը իր դինամիկայով և լարվածությամբ վերածվեց ֆուտբոլային թրիլլերի: Առաջին կեսում մեր թիմը 2 գնդակ խփեց և վերահսկում էր մրցավեճի ընթացքը: Երկրորդ կեսում «Փյունիկը» չօգտագործեց 5-6 իրական գոլային պահեր, ինչի հետևանքով խաղավարտին լարվածությունը հասավ գագաթնակետին: 82-րդ րոպեին դաշտի տերերը հաշիվը դարձրին 2:1, և ևս մեկ գնդակ խփելու դեպքում «Փյունիկը» դուրս կմնար հետագա պայքարից: Երկրպագուները բավական ագրեսիվ պահվածքով փորձում էին առաջ մղել իրենց թիմին, բայց «Փյունիկը» չկորցրեց զգոնությունն ու պահպանեց հաղթական հաշիվը:
Նշենք, որ մեր թիմը ցույց տվեց գրագետ և հասուն ֆուտբոլ՝ մրցակցին գերազանցելով գրեթե բոլոր առումներով:
Երկրորդ տարին անընդմեջ «Փյունիկը» հաղթահարում է Եվրոպա լիգայի խաղարկության որակավորման առաջին փուլը, ինչը խոսում է ակումբում ձևավորված պրոֆեսիոնալ մթնոլորտի մասին: Հիշեցնենք, որ անցյալ տարի «Փյունիկը» նույն մրցաշարի առաջին փուլում պայքարից դուրս էր թողել Հյուսիսային Մակեդոնիայի ամենատիտղոսակիր թիմերից մեկին՝ «Վարդարին», երկու հանդիպումների արդյունքում առավելության հասնելով 3:0 հաշվով: Որակավորման երկրորդ փուլում էլ «Փյունիկը» հաղթահարել էր ղազախական «Տոբոլի» արգելքը:
Նշենք նաև, որ ի տարբերություն հայկական մի շարք թիմերի՝ «Փյունիկում» տոն են տալիս հայ ֆուտբոլիստները: Այսինքն՝ խաղային մոդելը կառուցված է հայ ֆուտբոլիստների շուրջը, ինչը դրական երևույթ է: «Փյունիկի» կազմում խաղում են Հայաստանի ազգային հավաքականի 7-8 թեկնածուներ՝ Արմեն Մանուչարյան, Կառլեն Մկրտչյան, Արտակ Եդիգարյան, Արտյոմ Սիմոնյան, Էրիկ Վարդանյան, Արթուր Միրանյան, Էդգար Մանուչարյան: Այսօր Հայաստանում դժվար է գտնել թիմ, որտեղ կան հայաստանցի այսքան հեռանկարային և փորձառու ֆուտբոլիստներ:
Բարձր գնահատականի է արժանի նաև «Փյունիկի» գլխավոր մարզիչ Ալեքսանդր Տարխանովը, որը տակտիկական տեսանկյունից հիանալի էր կառուցել խաղը: «Էմոցիոնալ խաղ ստացվեց, հատկապես վերջաբանը, երբ հաշիվը դարձավ 2:1: Լավ հակագրոհների դիմեցինք, կարող էինք շատ գոլ խփել: Երկրորդ կեսի մեկնարկում եթե 5 մետրից գոլը խփեինք, չէին լինի այդ էմոցիաները, ու խաղը կավարտվեր: Մրցակցի ուժեղ կողմերն էին հակագրոհներն ու ստանդարտները, որոնք մենք այսօր լիովին բացառեցինք: Ամեն դեպքում, չգիտեմ՝ ինչու, այս անգամ ավելի հանգիստ էի: Գյումրիում շատ ավելի անհանգիստ ու մտահոգ էի: Բայց այսօր հավատում էի՝ կհաղթենք»,- խաղից հետո ասել է Տարխանովը:
«Շկուպի»-«Փյունիկ» հանդիպումն առանձնացավ նաև ֆուտբոլային թեժ մթնոլորտով, որն ապահովեցին մոտ 15 հազար երկրպագուները: Շատերը նախատում են երկրպագուներին ագրեսիվ դրսևորումների համար, բայց պետք է ընդունենք, որ սա ֆուտբոլ է, և նման երևույթները, ուզենք թե չուզենք, սիրված մարզաձևի մասն են կազմում:
Ինչևէ, Եվրոպա լիգայում երկրորդ տարին անընդմեջ հաջողություն գրանցեց նաև «Ալաշկերտը»: Վերջինս անցյալ տարի պայքարը սկսել էր Չեմպիոնների լիգայի խաղարկության որակավորման առաջին փուլից զիջելով շոտլանդական «Սելթիկին»: Հայտնվելով Եվրոպա լիգայի որակավորման երկրորդ փուլում՝ «Ալաշկերտը» պայքարից դուրս էր թողել Մոնտենեգրոյի չեմպիոն «Սուտիեսկային»:
Նշենք, որ ի տարբերություն անցյալ տարվա՝ այսօր «Ալաշկերտը» ցույց է տալիս շատ ավելի գրավիչ և գրագետ ֆուտբոլ: Չնայած կադրային լուրջ խնդիրներին՝ «Ալաշկերտի» գլխավոր մարզիչ Աբրահամ Խաշմանյանին կարճ ժամանակահատվածում հաջողվեց ձևավորել մարտունակ կոլեկտիվ: Նշենք նաև, որ ինչպես և «Փյունիկը», «Ալաշկերտի» ղեկավարությունը փորձում է թիմի կորիզը ձևավորել հայաստանցի ֆուտբոլիստներով:
«Փյունիկի» և «Ալաշկերտի» որդեգրած քաղաքականությունը պետք է օրինակ ծառայի մեր մյուս թիմերի՝ մասնավորապես «Բանանցի» համար: Վերջինս տարիներ շարունակ դուրս գալով Եվրոպա՝ անփառունակ ելույթներով ուղղակի խայտառակում է մեր երկիրը:
Որակավորման երկրորդ փուլում «Ալաշկերտը» մրցելու է ռումինական հայտնի «Ստյաուայի» հետ: «Փյունիկի» մրցակիցը չեխական «Յաբլոնեցն» է: Մեր երկու ակումբներին բաժին են հասել բավական ուժեղ մրցակիցներ, սակայն հաշվի առնելով այն տենդենցը, որ «Ալաշկերտի» և «Փյունիկի» խաղի որակը խաղից խաղ բարձրանում է, կարող ենք նշել, որ Եվրոպայի լիգայի որակավորման երրորդ փուլ դուրս գալը անլուծելի խնդիր չէ:
