Հայաստանում ծավալվող վերջին իրադարձությունները լայն արձագանք ստացան ոչ միայն մեր երկրում: Այս կապակցությամբ «Առաջին լրատվական»-ի հետ զրույցում քաղտեխնոլոգ Վիգեն Հակոբյանը նշեց, որ այն դատական բարեփոխումները, որոնց մասին ազդարարեց վարչապետը, նաև որոշակի և՛ փորձ են պահանջում, և՛ ռեսուրսներ, և այս տեսանկյունից՝ թե՛ մասնագետների առումով, թե՛ խորհրդատուների, թե՛ նաև ֆինանսների առումով, թերևս, Միացյալ Նահանգները կամ այլ երկրներ, որոնք նման պայմաններում դոնոր պետություններ են, շատ կարևոր է, որ արձագանքում են: «Միացյալ Նահանգների դեսպանատան հայտարարությունը, այսպես ասենք, բավականին դիվանագիտական հայտարարություն էր, որում, իհարկե, կար քաղաքական բաղադրիչ, որ ամեն ինչ, այնուամենայնիվ, պետք է Սահմանադրության շրջանակներում լինի: Մյուս արձագանքներում ևս այս կամ այն չափով կա դատական բարեփոխումների անհրաժեշտության մասին, բայց կա նաև, այս բառն օգտագործենք՝ նկատողություն, որ պետք է փորձել խոցելի չդարձնել պրոցեսը, ասենք, ինչ-ինչ գործողություններով, որոնք կարող են ոչ միանշանակ գնահատվել»,- նշեց նա:
Ազգային ժողովի պատգամավոր Միքայել Զոլյանի կարծիքով՝ և՛ ԱՄՆ դեսպանատան հայտարարությունը, և՛ մյուս հայտարարությունները ցույց են տալիս, որ մեր միջազգային գործընկերները գիտակցում են, որ Հայաստանում կա լուրջ խնդիր՝ արդարադատության համակարգին ժողովրդավարական բնույթ տալու խնդիրը: «Այսօր, ըստ էության, հեղափոխությունը անավարտ է, քանի որ ունենք արդարադատության համակարգ, որը ժառանգություն է մնացել նախկին համակարգից: Այս համակարգը պետք է փոխել: Խնդիրն այն չէ, որ բոլոր դատավորները վատն են կամ լավն են՝ նման բան չկա, խնդիրն այն է, որ վստահություն չկա այդ համակարգի հանդեպ: ցանկացած որոշում՝ աղմկոտ գործերի վերաբերյալ, ինչպիսին էլ լինի, հանրությունը կասկածով, անվստահությամբ է ընդունում, և նման իրավիճակը չի կարող երկար տևել: Որովհետև ցանկացած բարեփոխում որպեսզի որևէ շանս ունենա, մենք պետք է ունենանք անկախ, արդար և վստահելի դատական իշխանություն: Մեր միջազգային գործընկերները հասկանում են դա, հասկանում են նաև, որ դա հեշտ չի լինելու, հասկանում են, որ խնդիրը շատ խորն է, և անհրաժեշտ են վիրահատական միջամտություններ»,- ասաց նա:
Մանրամասները՝ տեսանյութում։