Մենք արդեն տեղեկացրել էինք, որ ԱՄՀ նախկին նախագահ Դոմինիկ Ստրոս Կանի գործը, որը հարուցվել էր նրա դեմ Նյու Յորքի Sofitel հյուրանոցի սպասուհուն բռնաբարելու մեղադրանքով, գնալով փլուզվում է, ինչի մասին հայտնի դարձավ դատական վերջին նիստի ժամանակ:
Հրապարակվել են որոշ մանրամասներ սպասուհու կյանքի մասին: Հայտնի է դարձել, որ երբ նա խնդրել է կացության իրավունք տրամադրել ԱՄՆ-ում, պատմել է, թե իբր իր երկրում պայքարել է դիկտատորական ռեժիմի դեմ, և նրա տունը այրել են, իրեն էլ ենթարկել կտտանքների: Վերջերս կայացած հարցաքննության ժամանակ նա խոստովանել է, որ այդ ամենը սուտ է: Բացի այդ, պարզվել է, որ նա մարմնավաճառությամբ է զբաղվել հյուրանոցում` դրա դիմաց ստանալով մեծ գումարներ:
Նաև հայտնի է դարձել, որ սպասուհին իր երկրից ԱՄՆ գաղթած միգրանտներից մեծ գումարներ է ստացել` խոստանալով կացության փաստաթղթերի պատրաստման գործում օգնել նրանց, սակայն միայն գրպանել է այդ գումարները: Դոմինիկ Ստրոս Կանի փաստաբան Դոները կարծում է, որ մեղադրանքը չունի դատական հեռանկարներ, քանի որ ոչ մի դատարան մեղավոր չի ճանաչի Դոմինիկ Ստրոս Կանին: Նա հավելել է, որ դատախազ Վենսուն «ստիպված է լինելու պատասխան տալ ոչ միայն գործի փլուզման համար, այլ նաև այն միջազգային սկանդալի, որը կարող է ցավոտ անդրադառնալ Ամերիկայի վրա»:
