Մեծի Տանն Կիլիկիո կաթողիկոս Արամ Առաջինը շնորհավորական ուղերձ է հղել ՀՀ նորընտիր վարչապետ Նիկոլ Փաշինյանին։ Ուղերձը հրապարակվել է կաթողիկոսարանի պաշտոնական կայքէջում։
Իր ուղերձում Արամ Ա-ն շեշտել է, որ Մեծի Տանն Կիլիկիո կաթողիկոսությունը ՀՀ վարչապետից ակնկալում է Հայաստան-Սփյուռք համագործակցությանը նոր ծավալների ու որակի հաղորդում ու այդ ամենն իր գործունեության շարժիչ ուժը դարձնելու կամք։
«Սիրելի՛ պարոն Փաշինյան,
Մեծի Տանն Կիլիկիո Կաթողիկոսության Անթիլիասի մայրավանքից Հայրապետական օրհնությամբ, քրիստոնեական ջերմ սիրով ու ազգային վառ ապրումներով ողջունում ենք Ձեր՝ ՀՀ վարչապետի պաշտոնում ընտրվելը», – ասված է շնորհավորական ուղերձում, որտեղ Արամ Ա կաթողիկոսը շեշտել է, որ Փաշինյանը երկրի վարչապետի պաշտոնը ստանձնում է Հայաստանի համար հույժ կարևոր մի ժամանակաշրջանում։
Ուղերձ-նամակում նաև ընդգծված է, որ Մեծի Տանն Կիլիկիո կաթողիկոսությունը հետևել է Փաշինյանի գլխավորած ժողովրդական շարժմանը՝ գնահատելով ժողովրդին բռնարարքներից ու արյունահեղությունից հետ պահելու, սիրո և համերաշխությունը ժողովրդի շարժիչ ուժը դարձնելու ջանքերը։
«Սիրելի՛ պարոն վարչապետ,
Ժողովրդի թեկնածուն լինելը մեծ պատիվ է ու միաժամանակ՝ ծանր պարտավորություն։ Մենք ակնկալում ենք, որ Ձեր տված խոստումները, բարոյական արժեքների ու մարդու իրավունքների ամուր պահպանմամբ, կյանքի կկոչեք։ Ակնկալում ենք, որ հայրենի մեր ժողովրդի, Արցախի ու մեր ազգի գերագույն շահերն ու ձգտումները քաղաքական նկատառումներից վեր կդասեք, ինչպես նաև միասնական հայրենիքի ու ազգի սկզբունքին՝ Հայաստան-Սփյուռք համագործակցությանը նոր ծավալ ու որակ հաղորդելով՝ այն կդարձնեք Ձեր կյանքի ու գործունեության շարժիչ ուժը։ Ջերմորեն շնորհավորում ենք Ձեր ընտրությունը, մշտապես մնալու ենք աջակից Ձեզ ու Ձեր գլխավորած կառավարությանը, ինչպես նաև գործնական մասնակիցը հայրենաշինության առաքելությանը»,- ասված է նամակում։
