Ինդոնեզիայում տուն ներխուժած գողը հանցագործություն կատարելիս կերակրել է լացող երեխային: Միջադեպը տեղի է ունեցել Ջակարտայի մերձակայքում: Այս մասին հաղորդում է Metro-ն:
Ձերբակալությունից հետո տեղի ունեցած մամլո ասուլիսում Քոջեք Միստա անունով հանցագործն ասել է, որ ինքը և իր հանցակիցները երկուշաբթի օրը տուն են մտել, որպեսզի այնտեղից տանեն թանկարժեք իրերը: Տանտիրուհին, աղմուկ լսելով, արթնացել և վախից գոռացել է: Չարագործները կապել են կնոջը և նրա երեխայի դայակին:
Աղմուկից արթնացել և լաց է եղել նաև փոքրիկ երեխան: Այդ ժամանակ Միստան երեխայի մորը հարցրել է՝ ի՞նչ պետք է անել, որպեսզի տղան հանգստանա: Վերջինս ասել է, որ պետք է նրան կաթով կերակրել: Հանցագործը գրկել է երեխային, նրան կերակրել և քնեցրել: Երբ երեխան քնել է, գողը նրան դրել է անկողնում: «Ես գիտեմ՝ ինչպես քնեցնել երեխաներին, ես ևս փոքրիկ ունեմ»,- ասել է Միստան:
Հետո հանցագործներն անհետացել են՝ իրենց հետ տանելով թանկարժեք իրերը:
Այժմ Միստային մինչև 10 տարվա ազատազրկում է սպառնում:
