ԱՄՆ նախագահի հանրապետական թեկնածու Դոնալդ Թրամփի կինը՝ Մելանյա Թրամփը, չորեքշաբթի երեկոյան իր թվիթերյան էջում ներկայացրել է ԱՄՆ իր ներգաղթի մանրամասները, բայց դրա հետ կապված փաստաթղթեր չի տրամադրել:
Թրամփի հակառակորդները ենթադրում էին, որ ծնունդով սլովենացի Մելանյա Թրամփն ԱՄՆ-ում որպես ֆոտոմոդել է աշխատել 90-ական թվականներին՝ այդ ընթացքում ամերիկյան տարածքում գտնվելով զբոսաշրջային վիզայով, ինչն օրենքի խախտում է:
Մելանյա Թրամփն իր թվիթերյան էջում նամակ է հրապարակել փաստաբան Մայքլ Ուայլդսից, որում ասվում է, որ իրավաբանն ուսումնասիրել է Մելանյա Թրամփի ներգաղթի փաստաթղթերը: «Ներգաղթի հարցերով փաստաբանի նամակը պարզ հայտարարում է, որ ես 100%-ով ճիշտ կերպով անցել եմ իրավաբանական գործընթացը, երբ ԱՄՆ ժամանեցի»,- հայտարարել է Թրամփը:
«Որոշ ԶԼՄ-ներում հնչում էին ենթադրություններ, որ 1995թ. տիկին Թրամփն անօրինական կերպով որպես մոդել է աշխատել ԱՄՆ-ում՝ այստեղ գտնվելով երկրի այցելուի վիզայով: Ես կարող եմ միաժամանակ հայտարարել, որ այդ ենթադրությունները չեն հաստատվում փաստաթղթերով, հետևաբար ոչ մի արժեք չունեն»,- հայտարարել է փաստաբան Ուայլդսը:
«Ի հեճուկս այդ հրապարակումների՝ տիկին Թրամփը երբեք չի աշխատել ԱՄՆ-ում 1995թ., նա 1995թ. ԱՄՆ-ում չի եղել»,- հավելել է իրավաբանը: Նրա խոսքով՝ Մելանյա Թրամփն ԱՄՆ է ժամանել 1996թ. զբոսաշրջային վիզայով, հետո այն փոխարինել է աշխատանքային վիզայով, որը հետո 5 անգամ երկարաձգել է: 2001թ. Մելանյա Թրամփը ԱՄՆ-ում բնակության թույլտվություն է ստացել:
Միևնույն ժամանակ, փաստաբանը որևէ փաստաթուղթ չի ներկայացրել:
