Արձագանքելով Սերժ Սարգսյանի «Մոկովսկիե նովոստի»-ին տրված հարցազրույցին՝ ՀԱԿ արտաքին հարաբերությունների հանձնաժողովի ներկայացուցիչ Վլադիմիր Կարապետյանը արձագանքել է.
«Հարցազրույցից անթաքույց երևում է, որ ԼՂ հակամարտության շուրջ երեք տարվա բանակցությունների արդյունքում մենք ոչ թե մոտեցել ենք խաղաղ կարգավորմանը, այլ հասել ենք պատերազմի շեմին: Ոչ մի առաջընթաց չկա բանակցային գործընթացում, չի էլ կարող լինել, որովհետև համարձակ կերպով բանակցություններ կարող է վարել միայն լեգիտիմ իշխանությունը: Թույլ, ժողովրդի աջակցությունից զուրկ իշխանություն չի կարող գնալ համարձակ քայլերի, փոխզիջումների: Եվ այդ ընկալումն այսօր գերակայում է նաև միջազգային հանրության մոտ: Դրանով է պայմանավորված Ս. Սարգսյանի դիրքերի թուլացումը միջազգային մակարդակում և քննադատական զեկույցների և մեկնաբանությունների աճը:
Նույն կերպ հուսահատ վիճակում է Ս. Սարգսյանը նաև հայ-թուրքական գործընթացի ձախողման պատճառով: Զգացվում է, որ նա այլևս չի հավատում, որ կարելի է առաջ մղել Արձանագրությունները: Սակայն նա չի կարող նաև հետ կանգնել դրանցից՝ հայտնվելով անելանելի վիճակում: Առհասարակ չկա ոչ մի ուղղություն, որը Ս. Սարգսյանը կարող է նշել որպես հաջողություն և այդ կերպ ներկայանալ հանրությանը: Բոլոր ոլորտներում նահանջ է և այն այլևս անկասելի բնույթ է կրում:
Սերժ Սարգսյանը զարմանում է, որ չի կարողանում օգտագործել Սփյուռքի ողջ ներուժը: Սակայն ի՞նչ կա զարմանալու. ինչպես կարող է վստահություն լինել մի երկրի նկատմամբ, որտեղ ծաղկում է կոռուպցիան, ուր կան քաղբանտարկյալները, որտեղ անպատիժ կերպով բոլորի աչքի առաջ սպանում են տաս մարդու, և տարիներով ազատազրկում քաղաքական ընդդիմախոսներին, որտեղ սահմանափակվում է ազատ խոսքը: Դրա հետ մեկտեղ չկա ազատ մրցակություն ներքին շուկայում, ինչը, բնականաբար, ստիպում է մեր հայրենակիցներին ձեռնպահ մնալ հայրենիքում ներդրումներից: Իրավիճակը կտրուկ կփոխվի միայն իշխանափոխությունից հետո, երբ Հայաստանում կվերականգնվի սահմանադրական կարգն ու ժողովրդի իշխանությունը»:
