«Ոսկե ծիրան» 10-րդ միջազգային կինոփառատոնի շրջանակում իրականացվող «Ռեժիսորներ առանց սահմանների» տարածաշրջանային ֆորումն անցկացվելու է հուլիսի 9-14-ը: Ներկայացված է 12 կինոնախագիծ: Հատկացվելու է երեք դրամաշնորհ՝ 5000 և 3500 եվրո արժողությամբ: «Ռեժիսորներ առանց սահմանների» նախագիծը ֆինանսավորվում է Եվրամիության Արևելյան գործընկերության մշակութային ծրագրի կողմից և իրականացվում է «Ոսկե ծիրան» կինոյի զարգացման հիմնադրամի և գործընկերների կողմից:
«Ոսկե ծիրան» կինոփառատոնի գեղարվեստական ղեկավար, կինոքննադատ Սուսաննա Հարությունյանի խոսքերով՝ իրենք փորձում են այս ծրագրի միջոցով բարձրացնել կինոարտադրության մակարդակը: Հայաստանի և տարածաշրջանի ռեժիսորների համար լավ հնարավորություն է՝ ներկայացնելու իրենց աշխատանքները և ֆինանսավորվելու:
«Ծրագիրը Եվրամիության աջակցությամբ սկսվել է 2011թ. նոյեմբերից, բավականին գործեր կատարվել են: Կան արդեն նկարահանված ֆիլմեր և նախագծեր: Ունենք նախագծեր, որ նվիրված են այլ երկրների կինոարտադրողներին»,- լրագրողների հետ զրույցում նշեց Սուսաննա Հարությունյանը:
«Ռեժիսորներ առանց սահմանների» ծրագիրը ներառում է մի քանի ուղղություն: Նախագծի համակարգող Լուսինե Մարտիրոսյանն ասաց, որ իրենց աշխատանքներն ընթանում են մի քանի ուղղությամբ: Նախ ուզում են միավորել տարածաշրջանի կինոգործիչներին և բարելավել Արևելյան գործընկերության անդամ երկրների կինոոլորտի օրենսդրությունը:
«Ադրբեջանի և Թուրքիայի հետ լարված հարաբերությունների պատճառով հաճախ Հայաստանը դուրս է մնում նման նախագծերից: Սակայն «Ռեժիսորներ առանց սահմանների» նախագիծը տարածաշրջանային ծրագիր է, և Հայաստանը ոչ միայն մասնակցում է, այլ նաև հանդես է գալիս որպես առաջնորդ»,- նշեց Սուսաննա Մարտիրոսյանը:
Նախատեսվում է հուլիսի 8-10-ն անցկացնել Հայաստան-Թուրքիա կինոպլատֆորմի նախագծերի զարգացման աշխատաժողով: Աշխատաժողովին մասնակցելու համար ընտրվել է 10 կինոնախագիծ՝ 5-ը Հայաստանից և 5-ը Թուրքիայից, որոնք մրցելու են 10 հազար և 5 հազար ԱՄՆ դոլարին համարժեք մրցանակների համար:
Հուլիսի 4-14-ը կանցկացվի «Կինոլրագրություն առանց սահմանների» դասընթացը: Հայ և միջազգային կինոլրագրողներից և կինոքննադատներից բաղկացած հանձնաժողովը դասընթացին մասնակցելու համար ընտրել է 11 մասնակից:
Հուլիսի 7-14-ը կանցկացվի «Ֆիլմեր առանց սահմանների» նախագիծը:
«Ոսկե ծիրան» 10-րդ Երևանի միջազգային կինոփառատոնի շրջանակում Արևելյան գործընկերության երկրների տասը ֆիլմ կցուցադրվի «Մոսկվա» կինոթատրոնում:
