Լեհաստանում բողոքում են Լեխ Կաչինսկու մահվան մասին նոր գեղարվեստական ֆիլմի դեմ՝ գրում է The New York Times-ը:
Խոսքը ռեժիսոր Անտոնի Կրաուզեի «Սմոլենսկ» ֆիլմի մասին է, որը պետք է վարձույթ դուրս գա 2014թ.:
Ինչպես ընդգծում է թերթը, նախագիծը բուռն բանավեճեր է առաջացրել լեհ հասարակության, այդ թվում՝ մշակույթի գործիչների շրջանում:
Երկրի որոշ առաջատար արտիստներ հրաժարվել են նկարահանվել ֆիլմում, իսկ Լեհաստանի մշակույթի նախարար Բոգդան Զդրոևսկին հայտարարել է, որ դեռ շատ վաղ է այդ ավիաաղետի մասին ֆիլմ նկարահանելը:
Իր հերթին 73-ամյա Կրաուզեն խոստովանում է, որ իր հայացքները չեն համընկնում իրադարձությունների նկատմամբ պաշտոնական տեսակետի հետ:
«Ինձ թվում է՝ ես պետք է նկարահանեմ այդ ֆիլմը, անգամ եթե ստացվի այնպես, որ ես միայնակ եմ դուրս գալիս բոլորի դեմ: Ես մտադիր եմ ցույց տալ ճշմարտությունը»,- ասել է ռեժիսորը:
«Սմոլենսկի» գլխավոր հերոսը լրագրող է, որն զբաղվում է ավիաաղետի հետաքննությամբ: Նա պարզում է, որ հասարակությունից թաքցրել են կարևոր տեղեկատվություն, իսկ իրականում ամեն ինչ այլ կերպ է եղել:
