Հունահռոմեական ոճի ըմբշամարտի Հայաստանի ազգային հավաքականը գերազանց ելույթ ունեցավ Թբիլիսիի 2013թ. Եվրոպայի առաջնությունում: Մրցաշարի զարդը դարձավ Արթուր Ալեքսանյանը, ում` մեկը մյուսի ետևից փայլուն գոտեմարտերն անտարբեր չէին թողնում նույնիսկ ամենասկզբունքային հակառակորդներին, նրանց մարզիչներին: 1in.am Sport-ը զրուցեց Արթուրի հոր և անձնական մարզչի` Գևորգ Ալեքսանյանի հետ, ով նշեց, որ ինքն էլ էր տպավորվել որդու ելույթներից, իսկ հաջողության գաղտնիքը համարում է Արթուրի աշխատասիրությունն ու նպատակասլացությունը:
«Ընդհանուր թիմի հետ կապված չէի ասի, որ սպասելիքներս ամբողջովին արդարացան, քանի որ սպասելիքներ ունեի 60 կգ քաշային կարգում հանդես եկող Ալեքսան Միքայելյանից, 66 կգ քաշային Սասուն Ղամբարյանից: Շատ ուրախացրեց Վաչիկ Եղիազարյանը: Արթուրը փաստացի հզոր էր այս քաշային կարգում, և անակնկալ կլիներ, որ չհաղթեր: Սակայն այս կարգի տարբերութունը նույնիսկ ինձ զարմացրեց:
Առաջին հերթին նրա աշխատասիրությունը կառանձնացնեմ: Նա միշտ կատարում է մարզիչների բոլոր առաջադրանքները: Նա իր կյանքը կապել է ըմբշամարտի հետ: Կարող եմ նշել աշխատասիրությունն ու նպատակասլացությունը:
Վիճակահանությունն այնպես էր ստացվել, որ մի խմբում էին հավաքվել Եվրոպայի բոլոր լավագույն մարզիկները: Բոլոր գոտեմարտերն էլ իրենց առանձնահատկություններն ունեին: Առաջին գոտեմարտում նա խնայում էր ուժերը երկորրդ գոտեմարտի համար, որպեսզի վրացի ըմբիշի դեմ ոչ մի հնարավորություն չտար ո´չ մրցավարներին, ո´չ հակառակորդին: Թուրք ըմբիշի դեմ գոտեմարտը սկզբունքային էր ոչ միայն մարզական առումով…
Եզրափակիչում Արթուրի հակառակորդն ավելի թույլ էր, սակայն մոտիվացիայի հետ կապված խնդիրներ չկային: Նա չէր թերագնահատում հակառակորդին: Ընդհանրապես` Արթուրը պայքարում է մինչև գոտեմարտի վերջին վայրկյանները:
Առաջիկայում Արթուրին կարճատև հանգիստ է սպասվում, որից հետո կսկսվեն մարզումները: Կարևոր մրցաշար է աշխարհի ուսանողական առաջնությունը, որից հետո արդեն նախապատրաստվելու ենք Աշխարհի առաջնությանը: Այդ ընթացքում կլինեն ուսումնամարզական հավաքներ Հայաստանում և արտերկրում»:
