Թուրքական Internet Haber լրատվական կայքի փոխանցմամբ՝ Թուրքիայի վարչապետ Ռեջեփ Էրդողանը շրջաբերական է հրապարակել՝ կապված Թուրքիայում ապաստանած սիրիացի փախստականներին օգնելու կամպանիա սկսելու հետ: Այդ կամպանիան տարվելու է երկրի ներսում:
Սիրիացի փախստականներին օգնելու համար երկրի բանկերում բացվել են հաշվեհամարներ, ուր Թուրքիայի բնակիչները, հասարակական կազմակերպությունները և այլն կարող են գումարներ փոխանցել: Էրդողանը դա համարել է մարդկային պարտք՝ Սիրիայի ժողովրդին որակելով որպես բարեկամական ու եղբայրական ժողովուրդ:
Հիշեցնենք, որ Թուրքիայի կառավարությունը երկրում գտնվող սիրիացի փախստականների վրա արդեն իսկ ծախսել է 400 միլիոն դոլար: Նրա զեկույցում նշված է, որ ներկայումս թուրքական տարածքում գտնվում է մոտ 145,000 սիրիացի փախստական:
Զեկույցում նշված է նաև, որ նախորդ տարվա գարնանը Սիրիայում սկսված բախումներից հետո Թուրքիայի սահմանը հատել է ավելի քան 200,000 սիրիացի փախստական, որոնցից ավելի քան 50,000-ն արդեն իսկ վերադարձել է հայրենիք: Թուրքիայի տարածքում գտնվող սիրիացի փախստականներին տեղավորել են 13 ճամբարներում: