Վերստին առաջնորդվելով՝ «Աստված մեզ հետ է, և օրհնյալ է մեր ուղին» կարգախոսով «Նժդեհ» աշխարհազորը պատրաստակամություն է հայտնել անհրաժեշտության դեպքում կանգնել Հայոց բանակի կողքին:
«Առաջին լրատվական»-ի հետ զրույցում հրամանատար, գեներալ-լեյտենանտ Արշալույս Փայտյանը նկատեց՝ թեև գլոբալ պատերազմ չի լինելու, բայց կա մի ասացվածք, որն իր մեջ ունի դարերի պատմություն և իմաստնություն՝ նա, ով ձգտում է խաղաղության, ամեն վայրկյան պետք է պատրաստ լինի պատերազմի:
«Իրավիճակի մասին բոլորս ենք տեղյակ, վերջին օրերին հաճախակի են դարձել Ադրբեջանի ոտնձգությունները, և բնականաբար, այսօր մեր հայկական բանակը իր անցած ճանապարհով ունի այնպիսի պատրաստվածություն, որ մենք հուզվելու, անհանգստանալու կարիք չունենք, հակառակորդի վերջին ոտնձգություններից հետո ևս մեկ անգամ համոզվեցինք, որ իրականում Հայոց բանակը իր պատրաստվածության, կազմակերպվածության, մարտունակության առումով գտնվում է բարձր մակարդակի վրա և այսօր պատրաստ է իր հայրենիքը ևս մեկ անգամ պաշտպանելու, ադրբեջանցիներին ևս մեկ անգամ ապացուցելու, որ հայոց միտքը, զենքը անկործանելի է: Այն ճանապարհը, որ հերոսացման ճանապարհ է, որը մեր տղաները անցել են, ունի իմաստ, բովանդակություն և հարկ եղած դեպքում կունենա շարունակություն»,- ասաց գեներալ-լեյտենանտը՝ հավելելով, որ ազատամարտիկները միշտ կլինեն հայ զինվորի կողքին, ավելին՝ կուղղորդեն առաջին գծում:
«Մեր ժողովրդի գենետիկ հատկությունների մեջ կա մի անկործան հատկանիշ՝ վտանգի ժամանակ բոլորս միատեղվում ենք, դառնում ենք բռունցք և կարողանում ենք մեր ճանապարհը հարթել: Դա դարերով է ապացուցված, այսօր նույնպես իրողությունն այնպիսին է, որ բոլորս ականատես ենք, որ բազմաթիվ ջոկատների հրամանատարներ անհրաժեշտության դեպքում պատրաստ են հերոսացման ճանապարհը ևս մեկ անգամ անցնել»,- ասաց Ա. Փայտյանը:
Ըստ նրա՝ Ադրբեջանը լավ գիտակցում է, որ կկրկնվեն այն նույն տարիները, և Ադրբեջանը հենց նույն իրավիճակում կհայտնվի, ուստի փորձում է դժվարացնել բանակցությունների ընթացքը, որպեսզի չունենա խաղաղ հանգուցալուծում, և հետո միայն, եթե պատրաստ լինի կամ ուժերի վրա հույս ունենա, կփորձի այլ գործողությունների դիմել. «Այսօրվա երևույթները չեն կարող ունենալ հանգուցալուծում, հատկապես մեր նախագահի, իշխանությունների մոտեցումներին տեղյակ ենք՝ միակ ձգտումը խաղաղ ճանապարհով հարցի լուծում ունենալն է, մենք պատերազմ երբևիցե չենք ցանկացել, այսօր էլ չենք ցանկանում, բայց հարկ եղած դեպքում մեզանից յուրաքանչյուրը պարտավոր է կանգնելու իր հայրենիքի պաշտպանության համար»,- ընդգծեց գեներալը՝ ավելացնելով, որ մեր զինվորների վերջին օրերին ցուցաբերած սխրագործություններից հետո հակառակորդը ևս հասկանում է՝ բացի անիմաստ ջղաձգումներից, ուրիշ ոչինչ չի կարող անել, ընդ որում՝ ջղաձգումները մեծամասամբ ի վնաս հենց Ադրբեջանի են:
«Մենք գիտենք իրենց զոհերի թվաքանակի մասին, մենք, իրեն ընդունելով հակառակորդ, ինչ-որ տեղ ուզում ենք հասկացնել, որ այդպիսի քայլերով հարցի լուծման չի կարող հասնել»,- մանրամասնեց Ա. Փայտյանը:
Ըստ նրա՝ Ղարաբաղյան ազատամարտը ինքնին իր մեջ ունի հզոր իմաստ, որը հետևյալն է՝ մենք երբևիցե հող չենք գրավել, մենք ազատագրել ենք մեր հայրենիքի մի մասը, և ադրբեջանցի զինվորը, բնականաբար, այդ մասին տեղյակ է: «Ինչքան էլ իրենց մամուլը ապատեղեկատվություն պրոպագանդի, միևնույն է՝ աշխարհը, բոլորը գիտեն, որ դրանք հայկական հողեր են, Հայաստանի մի մասն են կազմում, մենք պաշտպանում ենք մեր հայրենիքը, և հետևություն իրենց համար՝ ոտնձգություն են կատարում մեր հայրենիքի նկատմամբ, ուստի պիտի հասկանան և անիմաստ ոտնձգությունները դադարեցնեն, ոտնձգություն կատարող զինվորը երբևիցե չի կարող սխրագործություն կատարել»,- եզրափակեց հրամանատարը:
Առավել մանրամասն՝ տեսանյութում: