Ադրբեջանական Trend լրատվական գործակալության փոխանցմամբ՝ ԱՄՆ-ում գտնվող Իրանի նախագահ Մահմուդ Ահմադինեժադը ամերիկյան համալսարանների ուսանողների ու պրոֆեսորների հետ հանդիպման ժամանակ անդրադարձել է իրանա-ամերիկյան հարաբերությունների կարգավորման խնդրին.
«Իրանա-ամերիկյան հարաբերությունները կարող են բարելավվել: Ես պատկանում եմ այն մարդկանց թվին, ովքեր կարծում են, որ երկու ազդեցիկ և հզոր երկրների՝ Իրանի ու ԱՄՆ-ի միջև հարաբերությունների վիճակը կարող է բարելավել: Եթե Իրանի և ԱՄՆ-ի միջև հարաբերությունները լավ լինեին անցած 33 տարիների ընթացքում, ապա այսօր իրավիճակն այլ կլիներ:
ԱՄՆ-ը պետք է ընդունի այն փաստը, որ Իրանն ունակ է տեր կանգնել իրեն և չի վերադառնա նախկին վիճակին: Իսկ ամերիկյան սպառնալիքները չեն կարող կանգնեցնել Իրանի առաջընթացը: Սպառնալիքների պատճառով Իրանում և այլ երկրներում մարդկանց շրջանում բացասական կարծիք է ձևավորվում ԱՄՆ-ի մասին:
Եվ, այնուամենայնիվ, Իրանի ու ԱՄՆ-ի համագործակցությունը կարող է օգուտ բերել երկու կողմին էլ: Երկկողմանի հարաբերությունների կարգավորման համար անհրաժեշտ է, որ ԱՄՆ-ը վստահի Իրանին»:
