ԱՄՆ նախկին պետքարտուղար Քոնդոլիզա Ռայսը խոսել է այն մասին, թե ինչպես կդատեին Ուկրաինայի նախկին վարչապետ Յուլյա Տիմոշենկոյին ԱՄՆ-ում:
Պատասխանելով հարցին՝ եթե Տիմոշենկոյի դատական գործընթացը տեղի ունենար ԱՄՆ-ում, ինչպես կքննվեր գործը ամերիկյան դատարաններում, Ռայսը հայտարարել է. «Լավ հարց է: Գործն այնպիսին է, որ առաջին հերթին ցույց է տալիս հասարակության վստահության աստիճանը դատական համակարգի նակատմամբ՝ թե որքանով են դատարանները անկախ ու քաղաքականապես անկողմնակալ»,- «Կոմերսանտը» մեջբերում է նրա խոսքերը:
«Իմ երկրում կան քաղաքական գործիչներ, որոնք պատժամիջոց են կրում ազատազրկման վայրերում, քանի որ հանցագործություն են կատարել: Միևնույն ժամանակ, նրանց մեղքը ոչ ոքի մոտ կասկած չի հարուցում, ինչպես կասկած չի հարուցում ամերիկյան դատարանների արդարությունն ու անկողմնակալությունը: Օրինակ՝ մեզանում դատավճիռը կայացնում է երդվյալ ատենակալների դատարանը, որը բաղկացած է առանձին ընտրված մարդկանցից: Ես չեմ հիշում մի դեպք, որ հասարակությունը կասկածեր ԱՄՆ դատական համակարգի անկախությանն ու արդարությանը: Դա շատ բանի մասին է վկայում»,- հայտարարել է Ռայսը:
Նրա խոսքով՝ ի տարբերություն Ամերիկայի, Ուկրաինայում Տիմոշենկոյի գործը կասկածի տակ է դրել դատական իշխանության անկախությունը իշխանական համակարգից: «Ես անձամբ ճանաչում եմ Տիմոշենկոյին ու տանջվում եմ նրա առողջական վիճակի համար և մշտապես մտածում եմ, թե նրա դեմ գործը կարող է քաղաքականապես մոտիվացված լինել: Ամերիկան ու Եվրոպան ուշադիր հետևում են այս աղմկահարույց գործի զարգացմանը, քանի որ իմիջային ու վարկանիշային մեծ ռիսկեր է պարունակում Ուկրաինայի համար»,- ասել է նա:
Նշենք, որ Քոնդոլիզա Ռայսը մասնակցում էր Յալթայի 9-րդ ամենամյա «Ուկրաինան ու աշխարհը. Հաղթահարել վաղվա մարտահրավերները միասին» հանդիպմանը:
