Չափ ու սահման

Երեկ Հայաստանում բավական ուշագրավ իրադարձություն է տեղի ունեցել: Երեւանում ասուլիս են տվել թուրքական «Հզոր Թուրքիա» կուսակցության նախագահ Թունա Բեքլեւիչը եւ նրա մի քանի կուսակիցներ, որոնք շաբաթներ առաջ թուրքական մամուլով հայտարարել էին, որ հատել են հայ-թուրքական սահմանն ի նշան դրա փակ լինելու մասին բողոքի: Խոսքը, բնականաբար, անօրինական հատման մասին է: Երեւանում թուրք գործիչները կրկնել են նույն բանն ու ասել, թե Հայաստանի սահմանը հսկող ռուս սահմանապահները իզուր են փորձում հերքել իրենց եւ ապացուցել, թե սահմանն իրենք չեն հատել: Եվ ահա այդ` արդեն կարծես թե մոռացվող իրադարձությունը երեկ նոր զարգացում է ունեցել, եւ Հայաստանի Ազգային անվտանգության ծառայությունը երեւանյան ասուլիսից հետո բերման է ենթարկել թուրքերին` «զրուցելու նպատակով», կապված սահմանի վերաբերյալ նրանց հայտարարությունների հետ: Այս ամենն այլ կերպ, քան ֆարս պարզապես դժվար է անվանել, որը վկայում է իրականում այն մասին, որ Հայաստանի անվտանգության ծառայությունները կարողանում են լավ հսկել միայն սեփական երկրի այլախոհ քաղաքացիներին եւ միայն այդ հարցում են մասնագիտացել: Բանն այն է, որ որեւէ երկրի հատուկ ծառայություն եթե իրապես կատարում է իր գործառույթը, ապա թուրք գործիչներին պետք է ձերբակալեր ոչ թե ասուլիսից հետո, այլ ասուլիսի դահլիճ մուտք գործելիս: Ավելին` ակնհայտ է, որ նրանք այս անգամ Հայաստան են եկել օրինական ճանապարհով: Եվ հարց է առաջանում, թե ինչպե՞ս են թուրք գործիչները անցել Հայաստանի սահմանային կետը, եթե նրանք ոչ թե միայն այսօր են հայտարարել Հայաստանի սահմանը խախտած լինելու մասին, այլ հայտարարել էին շաբաթներ առաջ եւ ոչ մեկ անգամ, եւ ներկայացրել էին լուսանկարներ: Այսինքն` այդ մարդիկ պարզապես պետք է բերման ենթարկվեին կամ ձերբակալվեին հենց Հայաստանի սահմանային անցակետից երկիր մուտք գործելիս, ոչ թե մտնեին, հասնեին մայրաքաղաք, ասուլիս տային, նոր հետո միայն «զրույցի կանչվեին ԱԱԾ»: Եվ այս ամենից հետո հարց է առաջանում, իսկ ե՞րբ է ԱԱԾ-ն զրույցի հրավիրելու ռուս սահմանապահներին, որպեսզի նրանց եւ թուրք գործիչների միջեւ առերեսում կազմակերպի` պարզելու համար, թե իրականում ովքե՞ր են սուտ խոսում` թուրքե՞րը, որ հայտարարել են Հայաստանի սահմանը հատած լինելու մասին, թե՞ ռուսները, որ իբր հսկում են այդ սահմանն ու հայտարարել են, որ սահմանի խախտում չի եղել: Իսկ ընդհանուր պատկերը իրականում ի ցույց է դնում, ընդ որում` բավական վտանգավոր ասպեկտով, Հայաստանի անպաշտպանվածությունը, եւ այդ ամենը անվտանգության մասին այն ամպագոռգոռ խոսքերի ֆոնին, որ պարբերաբար հնչում են իշխանական շուրթերից: