Հայաստանի ազգային հավաքականի և «Շախտյոր»-ի կիիսապաշտպան Հենրիկ Մխիթարյանը հարցազրույց է տվել ռուսական լրատվամիջոցներին:
– Մրցաշրջանի նման հաջող մեկնարկը հաճելիորեն զարմացրեց բոլորին: Նոր խաղաշրջանից առաջ մտածու՞մ էիք, որ քանակը պետք է վերածվի որակի:
– Ես միշտ էլ նման մտքեր եմ ունեցել: Ես գտա այդ հարցի պատասխանը և սկսեցի աշխատել իմ սխալների վրա: Կարծում եմ` դա ինձ հաջողվեց, սակայն պետք է շարունակել աշխատել, քանի որ կատարելությունը սահմաններ չունի: Կանեմ հնարավոր ամեն ինչ ավելի շատ գոլեր հեղինակելու և թիմիս օգտակար լինելու համար:
– Ո՞րն էր անհաջողությունների պատճառը:
– Կարծում եմ` սառնասրտությունս չէր բավարարում : Այժմ ես ավելի հանգիստ եմ դարձել:
-Հետևե՞լ եք «Դինամո»-ի երեկվա խաղին:
-Այո, շնորհավորում եմ նրանց ՉԼ գավաթի խաղարկության խմբային փուլի ուղեգիր ձեռք բերելու կապակցությամբ:
– Նրանց երեկվա խաղն ազդեցություն կունենա՞ կիրակնօրյա հանդիպման վրա:
– Չգիտեմ: Մենք կենտրոնացած ենք մեր խաղի վրա: Մեզ համար կարևոր է, թե ինչպիսի խաղ կցուցադրենք մենք, այլ ոչ թե «Դինամո»-ն: Ընդ որում` մենք կխաղանք սեփական հարկի տակ` երկրպագուների աջակցությամբ: Կանենք հնարավոր ամեն ինչ հաղթանակի հասնելու համար:
– «Կարպատներ»-ի հետ կայացած հանդիպման վերջում Դուք Դարիոյի հետ ինչ-որ պար կատարեցիք: Կտեսնե՞նք երբևէ հայկական պար Ձեր կատարմամբ:
– Կփորձեմ որևէ պար սովորել և այն ցուցադրել խաղադաշտում:
– Մե՞ծ է լարվածությունը «Դինամո»-ի հետ կայանալիք հանդիպումից առաջ:
– Մենք նախապատրաստվում ենք առաջնության հերթական հանդիպմանը, որևէ արտասովոր բան չի նախատեսվում:
– Այսօր տեղի կունենա ՉԼ գավաթի խաղարկության խմբային փուլի վիճակահանությունը: Ո՞ր ակումբի հետ կցանկանայիք պայքարել:
– Կարելի է ասել, որ ինձ համար տարբերություն չկա: Պարզապես պետք է ճանաչել հակառակորդին` նրա հանդեպ առավելության հասնելու համար:
– «Դինամո»-ի հետ հանդիպումները միշտ լարված են ստացվում: Ի՞նչ է պետք անել դրանից խուսափելու համար:
– Այո, նման խաղերում հույզերը միշտ գերակշռում են, սակայն մենք կփորձենք անել ամեն ինչ, որ այդ հանգամանքն ազդեցություն չունենա մեր խաղի վրա: Պարզապես պետք է մեզ բնորոշ ֆուտբոլ ցուցադրենք:
