Էկվադորի իշխանությունները WikiLeaks կայքի հիմնադիր Ջուլիան Ասանժին քաղաքական ապաստան տալու վերաբերյալ որոշում կկայացնեն Լոնդոնի Օլիմպիական խաղերից հետո, որոնք կավարտվեն օգոստոսի 12-ին: Այս մասին, ինչպես հաղորդում է էկվադորյան El Tiempo պարբերականը, հայտնել է երկրի արտգործնախարար Ռիկարդի Պատինիոն:
«Մենք որոշում կկայացնենք, որը չի ազդի ՄԵծ Բրիտանիայի հետ մեր փոխհարաբերությունների վրա: Չի բացառվում, որ այն կտարբերվի բրիտանական կառավարության դիրքորոշումից, բայց մենք խելամիտ կլինենք և չենք դիպչի Օլիմպիական խաղերին»,- մեկնաբանել է Պատինիոն:
Նախքան որոշում կայացնելը, Էկվադորը կխորհրդակցի Շվեդիայի և Մեծ Բրիտանիայի հետ, սակայն իշխանությունները կհիմնվեն հումանիզմի սկզբունքների վրա:
Բրիտանիայի դատարանը վճռել է Ջուլիան Ասանժին արտահանձնել Շվեդիային, որտեղ նա մեղադրվում է երկու կանանց նկատմամբ սեռական ոտնձգություն իրականացնելու մեջ: Ասանժը մտավախություն ունի, որ Շվեդիան կարող է իրեն արտահանձնել ԱՄՆ-ին, որտեղ էլ նրան կարող է մահապատիժ սպասվել լրտեսության համար: Հունիսի կեսերին Ասանժը քաղաքական ապաստան է խնդրել Էկվադորից և ժամանակավորապես ապաստան է գտել Լոնդոնումʽ Էկվադորի դեսպանատանը:
