Կատալոնիայի Խերոնա մարզում հուլիսի 24-ի երեկոյան բռնկվել է խոշոր բնական հրդեհ, որի տարածքը կազմել է 14 հազար հեկտար, հաղորդում է Agence France-Presse-ը:
Կատալոնիայի ներքին գործերի նախարարի խոսքերով՝ հրդեհն ամբողջությամբ կմարվի հուլիսի 27-ին:
Հրդեհի հետևանքով զոհվել է 4 մարդ, այդ թվում Ֆրանսիայի 3 քաղաքացի, 6 մարդ տեղափոխվել է հիվանդանոց: Կատալոնիայի կառավարության տվյալներով՝ ընդհանուր առմամբ տուժել է 23 մարդ: Հրդեհի մարման աշխատանքներում ներգրավվել է 1500 մարդ, ինչպես նաև իսպանական և ֆրանսիական հրշեջ ինքնաթիռներ:
Հուլիսի 24-ին վտանգավոր գոտուց տարհանվել է մի քանի հարյուր մարդ: Ենթադրվում է, որ հրդեհի բռնկման պատճառը եղել է ծխախոտի մնացորդը: Երկրի իշխանություները խնդրել են քաղաքացիներին զգոն լինել և ոստիկանությանը շտապ հայտնել նման դեպքերի մասին:
Հրդեհի շրջանին մոտ գտնվող բնակիչներին կարգադրվել է դուրս չգալ տներից, չբացել դռները և պատուհանները:
Եվրոպայում անտառային հրդեհներ բռնկվում են ոչ միայն Իսպանիայում, այլև Ֆրանսիայի հարավում՝ Կատալոնիայի սահմանից ոչ հեռու, ինչպես նաև Պորտուգալիայում, Խորվաթիայում և Հունաստանում:
