BBC ընկերությունը բրիտանացի գործարար Թերի Ջեյքոբսին նամակ է ուղարկել` խնդրելով փոխել իր ընկերության անվանումը, որը զբաղվում է վերանորոգման մանր աշխատանքներով ու կենցաղային իրերի վերանորոգմամբ:
Ինչպես հայտնում է The Daily Mail-ը, նրա ընկերության անվանումը` Tel’s DIY SOS-ը նման է BBC հեռուստաալիքի DIY SOS հաղորդման անվանմանը, որը պատմում է բնակարանների վերանորոգման մասին:
BBC-ի ներկայացուցչի խոսքով` ընկերությունը պահանջել է փոխել անվանումը` ելնելով սեփական ապրանքանիշի պաշտպանությունից:
Ջեյքոբսը ապրում է Անգլիայի հարավում` Վորտֆիլդ գյուղում, ու ծառայություններ է մատուցում միայն տեղացիներին` նրանց այցելելով իր բրենդային ֆուրգոնով: Ջեյքոբսի խոսքով` ինքն իմացել է հաղորդման գոյության մասին, սակայն դա նկատի չի ունեցել իր ընկերության համար կարգախոս հորինելիս: Տղամարդը զարմացել է, որ խոշոր կորպորացիան իր պես փոքր ձեռներեցին նման պահանջներ է ներկայացնում, հայտնում է BBC-ի ռուսական ծառայությունը:
DIY SOS (Արա դա ինքնուրույն SOS) շոուն BBC-ի եթերում ցուցադրվում է 1999-ից: