Սիրիայի հայկական համայնքը բավականին կազմակերպված է այս օրերին: Դրա ապացույցն այն է, որ հայ համայնքի դեմ ուղղված որևէ կոնկրետ գործողություն մինչ օրս չի իրականացվել: Այս մասին այսօր լրագրողների հետ հանդիպմանն ասաց արաբագետ Արմեն Պետրոսյանը:
Սիրիահայերի զանգվածային արտագաղթ, ըստ բանախոսի, այս օրերին չկա: «Սրանք մասնավոր դեպքեր են, համայնքի ամբողջական վերաբնակեցման մասին խոսակցություններ անգամ չկան: Այս փուլում սխալ է այդ մասին խոսելը: Մեր բոլորի գործողությունները պետք է նպատակաուղղված լինեն այդ համայնքի պահպանությանը, որովհետև դա մեր ներկայացուցիչն է Մերձավոր Արևելքում»,- ասաց արաբագետը:
Արմեն Պետրոսյանի խոսքով` մեծ ձեռքբերում է այն, որ 23 միլիոնանոց Սիրիայում 60 հազարանոց հայկական համայնքն ունի իր ներկայացուցիչը կառավարությունում: Սա, ըստ նրա, խոսում է այն մասին, որ հայերի դիրքերն ամուր են Սիրիայում: Արաբագետի խոսքով` շատ երկրներից են այսօր ցանկանում հաստատվել Սիրիայում, ինչու պետք է հայ համայնքը հեռանա: Նա նաև նշեց, որ իր ունեցած տեղեկություններով` Հայաստանից պարբերաբար Սիրիա են գնում բանագնացներ` ծանոթանալու իրավիճակին:
Արմեն Պետրոսյանը կոչ արեց «վերջ տալ ապատեղեկատվությանը և սիրիահայերին հայրենիքում չընդունելու հարցը չշահարկել»: Իսկ շահարկողներին խորհուրդ տվեց մեկնել Սիրիա և տեղում հոգեբանական աջակցություն ցուցաբերել սիրիահայերին: «Վարդան Օսկանյանը Facebook-ում քննարկում էր սիրիահայերի հարցը: Ես որ կարդում էի սիրիահայերի արձագանքը, հանդիպեցի նման տեսակետի: Նույն Վարդան Օսկանյանը պատգամավոր է, ի՞նչն է նրան խանգարում, որ պատվիրակություն կազմի և գա տեղում իրավիճակին ծանոթանալու»,- նշեց արաբագետը: Նրա խոսքով` «հայրենիք» ասելով` սիրիահայերն առաջին հերթին նկատի ունեն Հայաստանի Հանրապետությունը, ոչ թե իշխանություններին: Հետևաբար` հայերը պետք է այսօր ավելի շատ հոգեբանական աջակցություն ցուցաբերեն նրանց, իսկ իշխանություններն անցողիկ են: «Սա համայն հայության խնդիրն է, որովհետև վտանգված է համայն հայության մի կարևոր համայնքի անվտանգությունը: Մենք պետք է ոչ թե քննադատենք ինչ-որ մեկի գործունեությունը կամ անգործությունը, այլ նոր գաղափարներ դնենք շրջանառության մեջ, խորհուրդներ տանք»,- կոչ արեց արաբագետը:
Արաբագետ Սարգիս Գրիգորյանն էլ նշեց, որ այսօր պետք է սիրիահայերի խնդիրները մեր ուշադրության կենտրոնում լինեն, և հայրենիքը պատրաստ լինի ընդունելու նրանց:
Արաբագետների կանխատեսումներով` առաջիկայում Սիրիայում բախումները կակտիվանան: Նման ենթադրությունների տեղիք է տալիս օրերս Դամասկոսի անվտանգության ծառայության շենքի պայթյունը, որին զոհ գնացին երկրի անվտանգության ծառայության ղեկավարն ու պաշտպանության նախարարը: Ըստ արաբագետների` Բաշար Ալ-Ասադի կողմնակիցներն այս դեպքից հետո կփորձեն ակտիվացնել պատժիչ գործողությունները: Իսկ Սիրիայի ընդդիմությունը, ոգևորված հաջողություններից, ավելի զանգվածային կդարձնի ծավալած գործողությունները: Բանախոսները նշեցին, որ այսօրվա տեղեկություններով` Դամասկոսում իրավիճակը լիովին վերահսկելի է: Արաբագետներին անհանգստացնում են Հալեպում հնչած կրակոցները, քանի որ դրանք կարող են սպառնալ տեղի հայկական համայնքի անվտանգությանը:
