Չնայած Իրանի դեմ առկա մի շարք պատժամիջոցներին, Ռուսաստանն ու Ադրբեջանը մտադիր չեն դադարեցնել համատեղ նախագծերի իրականացումը, որոնցից մեկը միջազգային «Հյուսիս-Հարավ» տրանսպորտային միջանցքի շրջանակներում երկաթուղու կառուցումն է:
Երեք երկրները իրենց տրանսպորտային համակարգի զարգացման համար առաջնահերթ են համարում այս նախագիծը,- գրված է հոդվածում: Այն հնարավորություն պետք է ընձեռի բեռներ և ուղևորներ տեղափոխել Սկանդինավիայից մինչև Հնդկական օվկիանոսի ավազանի երկրներ:
Մոսկվան, Բաքուն և Թեհրանը բանակցում են արդեն 10 տարի, իսկ վերջին հանդիպմանը արդեն կոնկրետ համաձայնություն է կայացվել Ադրբեջանի և Իրանի տարածքում երկաթուղու ճյուղի կառուցման մասին: Այդ նպատակով հատուկ ընկերություն է ստեղծվելու՝ 3 միլիոն դոլար կապիտալով: Աշխատանքների հիմնական ծավալը նախատեսվում է կատարել Իրանի տարածքում, իսկ ահա Ադրբեջանը պետք է ներդրումներ անի երկաթուղային համակարգի արդիականացման համար:
Հանդիպումից հետո «ադրբեջանական երկաթուղիներ» ընկերության ղեկավարը շեշտել էր, որ նախագիծը տնտեսապես շատ շահավետ է, այդ իսկ պատճառով դրան ցանկանում է միանալ 17 պետություն:
Փորձագետները կարծում են, որ «Հյուսիս-Հարավ» նախագիծը շահավետ է ոչ միայն ներգրավված պետությունների համար: Դրա իրագործումից հետո Եվրոպայից մինչ Հնդկական օվկիանոս ընկած ճանապարհը կրճատվում է մոտ 800 կիլոմետրով, ինչը նախնական փուլում հնարավորություն կտա բեռնափոխադրումները ավելացնել 5 միլիոն տոննայով՝ հեռանկարում հասցնելով մինչև 20 միլիոն տոննայի: Որպես մեկ այլ առավելություն նշվում է ժամանակի խնայողությունը: Երկաթուղին Սուեզի ջրանցքի համեմատ հնարավորություն կտա տնտեսել մինչև 20 օր ժամանակ:
