Ուկրաինայի նախկին վարչապետ Յուլիա Տիմոշենկոն սպառնում է կոտրել իր հիվանդասենյակի պատուհանը` պատճառաբանելով, որ իրեն թույլ չեն տալիս բջջային հեռախոսից զանգ կատարել: Այս մասին հայտնել է բանտային ղեկավարությունը:
Նրանք որոշել են այս միջադեպի մասին հայտնել հանրությանը, որպեսզի այն չօգտագործվի Տիմոշենկոյի կողմնակիցների կողմից:
Տիմոշենկոն դիմել է բանտային ղեկավարությանը` խնդրելով իրեն բջջային հեռախոսով խոսելու թույլտվություն տալ: Նրան բացատրել են, որ համաձայն՝ օրենսդրության նա կարող է օգտվել միայն հատուկ հեռախոսներից, որոնք գտնվում են ուղղիչ քրեակատարողական հիմնարկում: Ինչպես նաև նրան բացատրել են, որ բանտի աշխատակիցները իրավունք չունեն կալանավորներին իրենց բջջային հեռախոսները տալ մասնավոր խոսակցությունների համար:
«Տիմոշենկոն գրավոր ձևով բանտի ղեկավարությանը հայտնել է իր հիվանդասենյակում պատուհանները կոտրելու մտադրության մասին, որպեսզի իր կողմնակիցների հեռախոսներով, որոնք կանգնած են նրա հիվանդասենյակի պատուհանի տակ, շփվի այն մարդկանց հետ, ում հետ նա հարմար է գտնում»,- ասվում է հաղորդագրության մեջ:
Նախկին վարչապետի կողմնակիցները դեռ չեն մեկնաբանել միջադեպը:
