Հայաստանի և ԵՄ-ի միջև մուտքի արտոնագրերի դյուրացման և առանց թույլտվության բնակվող անձանց հետընդունման (ռեադմիսիայի) շուրջ համաձայնագրերի բանակցությունները ավարտին կհասցվեն մոտակա ամիսներին: «Առաջին լրատվական»-ի հետ զրույցում այս մասին ասաց Հայաստանի ԱԳՆ մամուլի խոսնակ Տիգրան Բալայանը:
«Փաստաթղթի տեքստի շուրջ բանակցություններն ընթացքի մեջ են: Հուսով ենք՝ դրանք ավարտին կհասցվեն մոտակա ամիսների ընթացքում, իսկ բուն ծրագրի գործարկման մասին դեռ վաղ է խոսել»,- ասաց նա՝ հիշեցնելով, որ Հայաստանի և ԵՄ-ի միջև մուտքի արտոնագրերի դյուրացման բանակցությունները մեկնարկել էին 2012 թվականի փետրվարի 28-ին:
Հիշեցնենք՝ մուտքի վիզաների դյուրացման համաձայնագրով ՀՀ քաղաքացիների համար կնախատեսվեն Շենգենյան գոտու երկրներ մուտքի արտոնագրեր ստանալու դյուրացված ընթացակարգեր: Համաձայնագրով սահմանվում է, որ Հայաստանի գիտնականները, ուսանողները, լրագրողները, գործարարները, սպորտի և արվեստի գործիչները և այլք վիզա կարող են ստանալ պարզեցված կարգով: Նախատեսվում է նաև նվազեցնել Շենգենի մուտքի արտոնագրերի գինը և դյուրացնել ընթացակարգերը:
Մուտքի արտոնագրերի դյուրացման համաձայնագրին զուգահեռ՝ Հայաստանը և ԵՄ-ը բանակցում են նաև հետընդունման մասին համաձայնագիր, որով կարգավորվելու են ԵՄ-ի և Հայաստանի տարածքում առանց թույլտվության բնակվող անձանց վերադարձի և հետընդունման հարցերը: