Այսօր` հուլիսի 15-ին, ավտովթար է տեղի ունեցել Գեղարքունիքի մարզում: Ժամը 19.00-ի սահմաններում Վարդենիս քաղաքից դեպի Մեծ Մասրիկ գյուղ տանող ճանապարհի երկաթգծի գծանցում իրար են բախվել «ԳԱԶ 3110» մակնիշի 55 ՍՏ 777 համարանիշի և «Օպել պրոնտերա» մակնիշի 13 ՍՍ 932 համարանիշի ավտոմեքենաները:
Ֆոտոլրագրող Գագիկ Շամշյանը News.armeniatv.com-ին հայտնել է,որ բախման հետևանքով «Օպել»-ը երկու-երեք անգամ գլխիվայր շրջվել է, ինչից «Օպել»-ի ուղևորը տեղում մահացել է:
Գագիկ Շամշյանը հայտնել է, որ իր տեղեկություններով «ԳԱԶ 3110»-ը վարել է Էջմիածին քաղաքի բնակիչ, ՀՀ պաշտպանության նախարարության X բանակային կորպուսի գնդապետ Գագիկ Հովհաննիսյանը:
Ֆոտոլրագրողը հայտնել է նաև, որ վթարի հետևանքով «Օպել»-ի վարորդը` Վարդենիս քաղաքի բնակիչ Ռուբիկ Գրիգորյանը, և ևս 3 հոգի, որոնցից 2-ը երեխաներ են, մարմնական վնասվածքներով տեղափոխվել են Վարդենիսի բժշկական կենտրոն:
Դեպքի վայր է ժամանել անձամբ Ճանապարհային ոստիկանության 2րդ սպայական գումարտակի հրամանատար, ոստիկանության փոխգնդապետ Արսեն Արշակյանը:
Տեղում է եղել նաև ոստիկանության քննչական գլխավոր վարչության Գեղարքունիքի մարզի քննչական բաժնի Վարդենիսի քննչական բաժանմունքի քննիչ Վարանցով Ղազարյանը:
Փաստի առթիվ ոստիկանության Վարդենիսի քննչական բաժանմունքում նյութեր են նախապատրաստվում:
Ֆոտոլրագրողին դեպքի վայրում հավաքվածները պատմել են, որ ավտովթարի պատճառ է դարձել այն, որ երկու ավտոմեքենաներն էլ միաժամանակ փորձել են վազանց կատարել:
