Ֆրանսիայի նախագահ Ֆրանսուա Օլանդը պահանջել է մտերիմներից չխառնել անձնական ու հասարակական կյանքը: Այս հայտարարությունը Օլանդը կատարել է հեռուստահարցազրույցի ժամանակ` իր ներկայիս սիրեցյալ Վալերի Տրիերվեյլերի շուրջ բարձրացած սկանդալի կապակցությամբ:
Նա սկանդալ էր հարուցել` Twitter սոցցանցում իր աջակցությունը հայտնելով սոցիալիստ Օլիվիա Ֆալորնին, ով մրցակցում էր խորհրդարանական ընտրությունների ժամանակ Օլանդի նախկին կնոջ` Սեգոլեն Ռուայալի հետ: Վերջինս հունիսի 17-ին պարտվել էր ընտրությունների 2-րդ փուլում, իսկ Տրիերվեյլերի վրա տեղացել էր քննադատությունների տարափ, այդ թվում` Օլանդի ու Ռուայալի ավագ որդու` Թոմ Օլանդի կողմից:
Ֆրանսիական ԶԼՄ-ները հաղորդում էին, որ Ռուայալի 4 երեխաները չեն ցանկանում տեսնել իրենց հոր նոր կողակցին: Անձամբ Թոմն այս մասին հայտարարել էր Le Point հրատարակությանը տված հարցազրույցում` ասելով, որ Տրիերվեյլերը ոչնչացնում է «նորմալ նախագահի» կերպարը, որ փորձում է ստեղծել իր հայրը:
«Ես տարանջատում եմ անձնական ու հասարակական կյանքը և կարծում եմ, որ մասնավոր գործերը լուծվում են անձնական կյանքի շրջանակում: Ես ասել եմ իմ մտերիմներին, որ նրանք հետևեն այդ սկզբունքին», – ասել է Օլանդը:
Նրա խոսքով` ինքը մտադիր չէ ստեղծել լրագրությամբ զբաղվող Տրիերվեյլերի համար առաջին տիկնոջ հատուկ կարգավիճակ:
