Amazon ինտերնետ-խանութը վաճառքից հանել է վերջերս հրապարակված «Երիտասարդ Կարավաջոն. Գտնված 100 ստեղծագործությունները» գիրքը: Պատճառը դեռևս հայտնի չէ: Իտալական Amazon-ի ներկայացուցիչը հրաժարվել է մեկնաբանություններից: Այս մասին տեղեկացնում է The Daily Telegraph-ը:
Գրքի հեղինակները՝ Մաուրիցիո Բերնարդելի Կուրուցը և Ադրիանա Կոնկոնի Ֆեդրիգոլին, նույնպես հայտարարել են, որ չգիտեն Amazon կայքից գրքի անհետացման պատճառը: Ֆեդրիգոլիի խոսքով՝ այն դեռ հնարավոր է գնել Lulu ինտերնետ-խանութում:
Կարավաջոյի 100 նոր աշխատանքների մասին գիրքը վաճառքում էր հայտնվել մի քանի օր առաջ, ընդ որում՝ լույս է տեսել միայն էլեկտրոնային տարբերակով: Հեղինակները հաստատել են, որ Կարավաջոյի անհայտ ստեղծագոծությունները իրենց հաջողվել է գտնել Միլանի Սֆորցա ամրոցի արխիվում: Նախկինում համարվում էր, որ այդ նկարները պատկանում են Պետերցանոյի վրձնին, որի արվեստանոցում Կարավաջոն աշխատել է 1584-88 թվականներին:
Սենսացիոն բացահայտումը շատ արվեստաբանների մոտ կասկածի տեղիք է տվել: Մասնավորապես, արխիվի գիդը հայտնել է, որ իրեն հայտնի չէ գրքի հեղինակների կողմից արխիվում հետազոտություններ անցկացնելու մասին որևէ բան: Պարզվել է նաև, որ գրքի հեղինակները այն հրապարակելուց առաջ չեն խորհրդակցել Կարավաջոյի փորձագետներից և ոչ մեկի հետ:
«Լուրջ գիտնականը ոչ թե էլեկտրոնային գիրք է թողարկում, այլ իր աշխատանքը հրապարակում է գիտական ամսագրում»,- գրքի հրատարակման առնչությամբ հայտարարել է ամրոցի արխիվի նախկին տնօրեն Թերեզա Ֆիորիոն: Միլանի քաղաքապետի խորհրդական Ստեֆանո Բոերին խոստացել է, որ քաղաքային իշխանությունները հետաքննություն կանցկացնեն՝ ստուգելու գրքի հրապարակման օրինականությունը:
