Ոստիկանապետը համարյա սրբերի շարքը դասվող ոստիկանների նոր սերիա էր խոստանում, բայց երեկ Հարսնաքարի մոտ ոստիկանների փոխարեն հանդիպեցի մահակավոր բանդայի: Այսօր «Առաջին լրատվական»-ի հետ զրույցում ասաց «ԵԼՔ» շարժման նախաձեռնող, կինովավերագրող Վարդուհի Սիմոնյանը՝ անդրադառնալով երեկ երեկոյան «Հարսնաքար» ռեստորանային համալիրի հարևանությամբ՝ Աճառյան փողոցի վրա, ոստիկանության գործողություններին Վահե Ավետյանի հիշատակին կազմակերպված մոմավառության մասնակիցների նկատմամբ:
Վարդուհի Սիմոնյանը նշեց, որ իշխանությունը՝ նախագահից, վարչապետից սկսած ու ոստիկանապետով վերջացրած խոհափիլիսոփայական, համարյա կաթողիկոսին վայել ելույթներ են ունենում, փոխարեն իրենց վրա դրված պարտավորությունները կատարելու և դրանց մասին հաշվետվություն ներկայացնելու հանրությանը: Ըստ նրա՝ երեկ «Հարսնաքարի» մոտ գործող ոստիկաններին կհամարի մահակավոր բանդա, որովհետև օրենքից դուրս գործողը, խաղաղ մոմավառության եկած մարդկանց ոտնատակ տվողը բանդիտ է, որ կա:
«Երեկ ես սեփական մաշկի վրա զգացի Վլադիմիր Գասպարյանի բարեփոխումների ողջ պերճանքն ու թշվառությունը, երբ ինձ թավագլոր անելուց հետո էլ այդ մթագնած ուղեղով երիտասարդը շարունակում էր հարվածներ տեղալ գլխիս ու ոտքերիս:
«Հարսնաքար» էր շպրտվել Գասպարյանի կողմից ռեֆորմացիայի ենթարկված «մատյան գունդը», որն առանց կանոնների մարտեր մղելով ավելի շուտ Նեմեցի անկիրթ ախրաննիկին էր հիշեցնում և ոչ ամենևին օրինապահի, ում համար քաղաքացու անվտանգությունը պետք է լինի մասնագիտական պարտք»,- մեկնաբանեց Վարդուհի Սիմոնյանը՝ շարունակելով, որ իր երեկվա տեսածը ոստիկանական համակարգ չէր, այլ հատուկ օլիգարխիային պաշտպանող սափրագլուխ ախրանա, ում անձրևի տակ առանց անձրևանոցի շպրտում են փողոց և քսի տալիս իր տիրոջը թարս բան ասած մարդկանց վրա: Ուստի «ԵԼՔ» շարժման նախաձեռնողը նկատեց, որ ոստիկանապետն ավելի լավ կանի փիլիսոփայելու փոխարեն մեկ անգամ էլ կարդա ՄԻՊ-ի հաղորդումը երեկվա դեպքերի վերաբերյալ և իրեն բացատրություն տա, թե իր որ արարքի պատճառով է Գասպարյանի ղեկավարած կառույցն իրեն ծեծել փողոցում:
Վարդուհի Սիմոնյանի կարծիքով՝ օլիգարխիան պետք է սանձահարվի, եթե սա արվեր վերևից, հանրային պրեսինգի հարկ չէր էլ լինի: Նրա խոսքով՝ Հայրապետյան Ռուբենը մեկն է նրանցից, ովքեր մեջ-մեջ են արել երկիրը և իրենց բառով ասած` «նայում են» ամբողջական մարզեր ու ավաններ, բաշխել են առանձին ոլորտներ ու մոնոպոլ իշխանություն հաստատել դրանց վրա, փայ են մտել քաղաքական շուկայում, իրենց հարմար խաղի կանոններ և արժեհամակարգեր են իջեցրել մեր գլխին:
Վարդուհի Սիմոնյանն ամենատագնապալին համարեց այն, որ այդ մարդիկ հանդես են գալիս իշխող կուսակցության, այսինքն՝ նախագահի բրենդի տակ, ուստի այստեղից երկու ելք կա. կամ վերևից է մաքրվում օլիգարխիան, կամ՝ ներքևից, հակառակ դեպքում Հայաստանին կսուլեն միջազգային պետավտոտեսուչները և կկատարվի այն, որ մենք մեր պատուհաններից կտեսնենք հայտնի երկրների երկնակամարում արդեն պտտված կործանիչներին:
«Եթե նախագահին պետք է մի քիչ էլ կամք փողոցից, ապա հանրային պահանջը փողոցում ձևակերպված է, թող գործի, մանավանդ որ` սոցիալական խնդիրների սրությունը կարելի է մեղմել գոնե այս հարցում արդարության հաստատմամբ: Ես չգիտեմ` որ դեպքում մնացած նախաձեռնություններն ու կուսակցությունները կդադարեն պայքարել: Ես իմ անունից կարող եմ ասել ընդամենը՝ սա մենակների կռիվ է, Վանո Սիրադեղյանի ասած` վճռական մենակի, հանուն արդիականացվող Հայաստանի, հանուն նրա, որ Հայաստանն ի վերջո ադեկվատ դառնա քաղաքակիրթ աշխարհի այսօրվա շարժերին»,- այսպես եզրափակեց իր խոսքը «ԵԼՔ» շարժման նախաձեռնող, կինովավերագրող Վարդուհի Սիմոնյանը:
Հիշեցնենք, որ Վարդուհի Սիմոնյանը երեկ ականատեսն է եղել հունիսի 17-ին «Հարսնաքար» ռեստորանային համալիրում դաժանորեն ծեծի ենթարկված, օրեր անց մահացած ռազմական բժիշկ Վահե Ավետյանի հիշատակին կազմակերպված մոմավառության տապալմանը և Աճառյան փողոցը մոմավառության մասնակիցներից ազատելու գործողություններին: