Թբիլիսիի Միխայիլ Մեսխիի անվան մարզադաշտը, որտեղ նախատեսված է անցկացնել Եվրոպայի Սուպերգավաթի խաղարկության հանդիպումը, կմեծացվի: Ներկայումս այն կարող է ընդունել 25 հազար հանդիսական:
«Մենք ցանկություն ունենք ավելացնել մարզադաշտի տարողությունը: Չնայած պետք է նշեմ, որ ներկայումս այն 25 հազար հանդիսական է տեղավորում, ինչը բավական կարելի է համարել: Մոնակոյի մարզադաշտն, օրինակ, 18 հազար ֆուտբոլասեր կարող է ընդունել. այդ երկիրն արդեն 15-րդ անգամ կանցկացնի Չեմպիոնների Լիգայի և Եվրոպայի Լիգայի հաղթողների հանդիպումը:
2013 թվականին խաղը տեղի կունենա Պրահայի «Էդեն» մարզադաշտում, որը կարող է ընդունել 20 հազար հանդիսական: Իսկ Ուելսի «Կարդիֆ Սիթի» մարզադաշտը, որտեղ կանցկացվի 2014 թվականի խաղը, կարող է ընդունել 21 հազար երկրպագու:
Սուպերգավաթի խաղարկության հանդիպումը տարբեր քաղաքներում անցկացնելու նախագծի ուղղությամբ աշխատել ենք 2 տարի: Ամբողջ Թբիլիսին պատրաստվում է այդ խաղին: ՈւԵՖԱ-ի կազմի մեջ մտնող բոլոր 53 ֆեդերացիաները պետք է հավասար պայմաններում գտնվեն: Ցանկանում ենք հավասարեցնել բոլոր երկրները: Ֆուտբոլը պետք է լինի առանց սահմանների և քաղաքականությունից դուրս»,- նշել է Վրաստանի ֆուտբոլի ֆեդերացիայի նախագահը:
