«ԷկոԼուր» տեղեկատվական ՀԿ-ի նախագահ, կենսաբանական գիտությունների թեկնածու Ինգա Զարաֆյանը համոզված է, որ Արարատյան դաշտավայրում ձկնաբուծարանների 3 անգամ ավելացումը մեծ վնաս է հասցնելու:
«Առաջին լրատվական»-ի հետ զրույցում Ի. Զարաֆյանը փաստեց, որ ներկայում գործող ձկնաբուծարաններն արդեն վնասում են դաշտավայրին. «Գրունտային ջրերը բարձրանում են, սկսվում է հողերի երկրորդային աղակալում, որովհետև այդ ամբողջ գործընթացը նորմալ բնապահպանական նորմերից չի վերահսկվում: Եթե 3 անգամ նորից ավելացնելու են արտադրությունը, դա նշանակում է, որ պետք է նաև ջրի օգտագործման ծավալներն ավելանան: Ինչի՞ հաշվին»:
Նա հիշեցրեց, որ անցած տարի այդ հարցը բարձրացվել էր ու պարզվել, որ ջրօգտագործման արտոնագրերը չեն համապատասխանում իրական պաշարներին: Ի. Զարաֆյանի խոսքով, ԱԺ թույլտվությամբ Սևանից վերցվող ջուրը, պարզ է, որ ուղղակի չի գնում ձկնաբուծարաններին, բայց անուղղակի է գնում. «Արտեզյան ջրերը, որ պետք է օգտագործվեին գյուղատնտեսության մեջ ոռոգման համար, օգտագործվում են ձկնաբուծարանների կողմից և գյուղատնտեսության պատրվակով Սևանից են վերցնում: Ոչ մի գիտական ու տնտեսական զարգացման հիմք չկա: Միայն բիզնեսի շահն է, որը տարանջատված է երկրի զարգացումից, և հակառակ ուղղությամբ են շարժվում»:
