«Սեփականության իրավունքի պաշտպանություն» ՀԿ-ն և սեփականությունը կորցրած բազում քաղաքացիներ այսօր բողոքի ակցիա են կազմակերպել կառավարության շենքի մոտ։ Կառավարության աշխատակիցները նրանց ասել են, որ այդ հարցով զբաղվում է քաղաքապետարանը։
ՀԿ-ի նախագահ Վաչագան Հակոբյանն ասում է, որ բազմիցս դիմել է քաղաքապետին, վերջին անգամ հունվարի 18-ին նամակ է հղել նաև նոր քաղաքապետ Կարեն Կարապետյանին։
«Այսօր կառավարությունից պատասխան չստանալով` ես գնացի քաղաքապետարան `ստանալու իմ նամակի պատասխանը։ Ես նամակում նշել էի, որ պատրաստ ենք համագործակցել քաղաքապետարանի հետ ու խնդրել էի հանդիպում նրա հետ»,-ասում է Հակոբյանը։
«Քաղաքապետարանում ասում են, որ Կարեն Կարապետյանը չունի հանդիպման օր, ու որ պիտի դիմենք Ծրագրի իրականացման գրասենյակ, որն էլ հենց խախտել է մեր սեփականության իրավունքը», – «Առաջին լրատվականի» հետ զրույցում ասում է Վաչագան Հակոբյանը։
Այսպես բնակության վայրը կորցրած մարդիկ արդեն 7-րդ տարին է` չեն կարողանում վերականգնել իրենց սեփականության իրավունքը` ստանալ համապատասխան փոխհատուցում կամ նոր բնակարան։
2003թ.-ին կացարանից զրկված մարդկանցից 8-ը մահացել են։ Այս տարիների ընթացքում շատերը հուսալքված լքել են երկիրը։
Սեփականություն իրավունքը պաշտպանելու նպատակով 30 հոգի դիմել է եվրոպական դատարան։