Այսօր ձերբակալվել է գործարար Նազարեթ Հագոփ-Բերբերյանի սպանության մեջ մեղադրվող Գևորգ Բադալյանը։ Հիշեցնենք, որ ամերիկահայ գործարարի սպանության մյուս երկու մեղադրյալներ Պետրոս Թեմիրյանը և Կարեն Դալլաքյանը անցյալ տարի դատապարտվել էին ցմահ ազատազրկման։
Սպանությունը կազմակերպել էր սպանվածի ընկեր Պետրոս Թեմիրյանը, մյուս երկու հանցակիցները օգնել են նրան ` իրագործել ծրագրածը։ Սպանությունը կատարվել էր խեղդամահ անելու միջոցով: Երեք հանցակիցները մեղավոր են ճանաչվել շահադիտական դրդումներով սպանություն իրագործելու մեջ։
1990-ականների կեսերին ամերիկահայ գործարար Նազարեթ Հագոփ-Բերբերյանը ձեռք է բերել Արարատի մարզի Դալար գյուղում գտնվող գորգագործական ֆաբրիկան, իսկ վերջին շրջանում որոշել էր Հայաստանում իրականացնել մի մեծ բիզնես նախագիծ. Բերբերյանը Երևանում` Աբովյան-Պուշկին խաչմերուկում կառուցում էր մեծ հյուրանոց։
2009 թ. ապրիլի 25-ի երեկոյան Բերբերյանը դուրս էր եկել իր բնակարանից և այլևս չէր վերադարձել: Նրա «Տոյոտա» մակնիշի ջիպ ավտոմեքենան հայտնաբերվել էր «Զվարթնոց» օդանավակայանի ավտոկանգառում: Ավելի ուշ` մոտ 20 օր անց, Երևան-Սևան մայրուղու 25,5 կմ հատվածում` ճամփեզրի ձորակում, իրավապահները հայտնաբերել էին գործարարի դին:
