Ադրբեջանական APA լրատվական գործակալության փոխանցմամբ՝ ԱՄՆ պետքարտուղարի փոխօգնական Էրիկ Ռուբինը Վիեննայում տեղի ունեցած ԵԱՀԿ անվտանգության հարցերով տարեկան կոնֆերանսի ժամանակ ունեցած իր ելույթում անդրադարձել է Ղարաբաղյան հակամարտության կարգավորմանը.
«Որպես ԵԱՀԿ Մինսկի խմբի համանախագահող երկիր՝ ԱՄՆ-ը հավատարիմ է մնում Ղարաբաղյան հակամարտության ամուր ու խաղաղ կարգավորմանը հասնելու հարցում կողմերին օգնություն ցուցաբերելուն: ԵԱՀԿ Մինսկի խումբը կենսական կարևորություն ունեցող կառույց է՝ պատերազմին վերադարձ կատարելը կանխելու և բանակցությունների միջոցով հակամարտող կողմերին խաղաղությանը մոտեցնելու համար:
Թեև Մինսկի խումբը առաջընթաց է ունեցել հակամարտության համապարփակ կարգավորման համաձայնագրին հասնելու ուղղությամբ, դեռ մնում են կարևոր անելիքներ: Ինչպես նշվեց հունիսի 18-ին նախագահներ Օբամայի, Օլանդի ու Պուտինի տարածած հայտարարությունում, հակամարտող կողմերը պետք է քաղաքական կամք ցուցաբերեն, որոշումներ ընդունեն, որոնք հնարավոր կդարձնեն հակամարտության խաղաղ կարգավորումը:
ԱՄՆ-ն ու նրա գործընկերները՝ Մինսկի խմբի համանախագահները, կողմերին կոչ են արել հրաժարվել ագրեսիվ հռետորիկայից, որը նպաստում է միայն հակամարտության երկարաձգմանը և ոչինչ չի անում բնակչությանը խաղաղության նախապատրաստելու համար»:
